BOLETÍN DA REAL ACADEMIA GALEGA
Traballos de investigación e estudo
sueste de Galicia (Álvarez 2004), este rexistro mostra que ou o procedemento gramatical en si mesmo ou voces concretas con este sufixo acadaron maior extensión (como tecedeira, que ocupa a metade sur de Galicia). Cómpre lembrar que labrar pode significar tanto 'arar' coma 'traballar a pedra, a madeira, o metal, etc.' e 'bordar'; tendo en conta que os substantivos xerados por medio de deira designan ocupacións femininas, é moi probable que dona María busque unha muller experta en labores de agulla e non man de obra para a labranza34. A interesante ambivalencia de primo xa foi referida amplamente máis arriba. 8. SAN JUAN DE AMORÍN 1. Lázaro de Losada, rexedor do concello de Baiona e administrador da casa de Gondomar xunto con Gregorio de Castro e Oia, móstrase reticente a dar entrada como caseiro a Domingos Davila, ante a petición que lle fai o seu amo, don Diego Sarmiento de Acuña. Os problemas que esa admisión pode ocasionar exemplifícaos coa situación de San Juan de Amorín, descrita en carta de 27 de agosto de 1606, ano e medio despois da carta que editamos, o que nos permite deducir que o autor da nosa carta é caseiro na facenda de don Diego en Gondomar:
Advierto quanto se debe reparar en dar la entrada a nadie que por tenerla San Juan de Amorín y ser dificultoso o vergonçoso quitársela se pasa y sufre que con medio hombre de servicio o labor sustenta esta hazienda de vm del casero siete personas, dos o tres puercos en cortello, ocho o diez gallinas, y ahora se agrega otra casa de yerno... [RB II/2127, 138].
A pasaxe transcrita mostra a pouca estima en que o administrador tiña ao caseiro, situación que concluirá co despido, como xa apuntamos na primeira parte deste traballo (BRAG 2004, 258)35. Na carta obxecto de estudo San Juan de Amorín lamenta que por negativa de Lázaro de Losada non puidera acompañar a don Diego Sarmiento de Acuña, seguramente na súa saída para Valladolid, que se produce a mediados do ano anterior á data de redacción da carta. Aproveitaría esa compañía para informalo sobre os seus traballos, tales coma o coidado da viña ou a plantación de árbores, que seguramente eran do gusto do seu señor. No segundo parágrafo pide unha aclaración sobre a liquidación das súas contas, xa que hai certa disputa polo feito de que «aquellos dos ducados36 y los çapatos fueron a quenta de mi selario», tal e como manteñen Francisco Bravo37 e Lázaro de Losada, en contra da posición do remitente. Lémbralle no terceiro parágrafo as promesas que lle ten feito de lle dar «un bo vestido», poñendo por testemuñas a Francisco Troncoso38 e frei Diego de Zamora39. Para este Troncoso envía unha mensaxe críptica, que literalmente debe transmitir don Diego, «e llo diga vosa mercé así». O obxecto da mensaxe é Mariquita, probablemente filla do
Nº 366 252