Estudos e investigacións sobre Xosé María Álvarez Blázquez
BOLETÍN DA REAL ACADEMIA GALEGA
enviarlle a un veciño que traballara con el folletos do SEG (Álvarez Blázquez, en Méndez Quintas, 216). Non será ata os anos 70 cando o ilustre homenaxeado volva atoparse coa cultura castrexa. Nesta ocasión nunha operación que tentaría salvar o posible do castro e a necrópole da illa de Toralla, ameazados pola inminente construción das torres que ao final esmagarían todo o contorno. Alí Xosé María descubriu varias casas, un forno de cerámica, un bo lote de cerámica cunha decoración moi rica e variada, unha agulla de coser e un anzol de bronce. Na parte central da illa había varias cistas, que xa visitara Obermaier, e que pensaba escavar (Obermaier, 1923). Nesta mesma época tamén traballaría no castro de Vigo, no que descubriría catro construcións de planta circular e recuperaría moitos fragmentos de cerámica castrexa, ánforas de distinta tipoloxía, sigillata, fíbulas e fusaiolas moitas delas decoradas. Todo ese material foi depositado no Museo Quiñones de León. Fóra do campo das escavacións, hai que salientar a súa preocupación pola recuperación de pezas e materiais, cumprindo así o seu papel como Comisario. A este respecto interesa aquí dar conta das novas que proporciona a Taboada Chivite co gallo da publicación da Escultura celtoromana na serie Cuadernos de Arte Gallego dirixida por el sobre os achados escultóricos en Tui e Gaxate (Acuña, 2007). No que respecta ao mundo romano o seu labor foi notable e unha mostra deste é a recuperación en épocas difíciles ?para o que se valeu do seu cargo honorífico de Comisario? de testemuños epigráficos da importancia do grupo de estelas da rúa de Pontevedra, as aras de Donón, a ara de Panxón e algunha outra peza de non menor interese. No ano 1953, con motivo dunhas obras na viguesa rúa de Pontevedra, sita no barrio do Areal, descubriuse unha estela, o que ocasionou a pertinente escavación que permitiu localizar trinta pezas enteiras ou fragmentadas dun grandísimo valor tanto pola súa morfoloxía e riqueza decorativa como pola epigrafía, que constitúen un conxunto único no ámbito de Gallaecia (Juliá, 1971). A nova do achado foi presentada á comunidade científica no III Congreso Nacional de Arqueoloxía que tivo lugar en Galicia e Norte de Portugal no mesmo ano (Álvarez Blázquez, 1955: 462475) e con posterioridade, xunto con Bouza Brey, foi obxecto dun fascículo das Inscripciones romanas de Galicia no que se recollerían todas as inscricións de Vigo e a súa comarca (Álvarez Blázquez e Bouza Brey, 1961: 542). En ambos os traballos rexístrase un pormenorizado estudo do contexto, é dicir, do que por aquel entón se sabía do Vigo romano, no que salientan a importancia tanto do castro como do barrio do Areal, o que a arqueoloxía urbana desenvolvida nos últimos anos vén confirmar. Non obstante, o máis importante é o estudo dedicado nas I.R.G. ao conxunto das estelas, xa que os autores non se limitan a unha análise epigráfica como era habitual na época, senón que fan unha serie de consideracións moi interesantes sobre as estelas relivarias, a indumentaria e a simboloxía. Neste sentido amosan estar ao
141 Nº 369