MANUEL MURGUÍA
229
dentemente da súa beleza ou singularidade, debe ser analizado polo arqueólogo, pois todo vestixio é susceptible de fornecer información sobre as formas de vida, os costumes, as crenzas, os medios técnicos ou a cronoloxía das sociedades que nos anteceden. Temos en Murguía, deste xeito, a consideración dunha cultura material arqueolóxica ampla e multiforme, que aspira a permitila reconstrucción de tódolos ámbitos das sociedades pretéritas. Bastante revelador resulta a inclusión, na segunda edición da Historia de Galicia, dun capítulo monográfico dedicado ás ?Armas y objetos importantes hallados en Galicia y pertenecientes á los períodos anteriores a la invasión ro m a n a ? (1901: 557567). E cando se estudie un obxecto dos considerados polos vellos anticuarios, como é o caso dunha xoia, xa non se atenderá só á beleza, á riqueza ou ás connotacións lendarias da mesma, senón que se tratará de chegar a hipóteses máis substanciosas. Así sucede, por exemplo, cando Murguía estudia o torques de Centroña, centrándose na observación das técnicas e motivos ornamentais, para chegar a definir semellanzas con pezas irlandesas ou micénicas, e a partir delas proseguilas indagacións (1912). A ampliación do rango de obxectos que importan ó intelectual lévanos a outro punto no que tamén se desmarca Murguía dos seus predecesores: se partimos de que son tantos e tan diversos os materiais que nos permiten coñecelo pasado, entenderase que, de combinalos datos que achegan todos, poderemos elaborar unha reconstrucción histórica máis fiable que a que atopamos nas fontes escritas, moitas veces capciosas e contradictorias. Así, é Murguía un dos primeiros galegos que non se conformará con dicilo senón que, sempre que poida, colocará a información arqueolóxica por riba doutros testemuños. Se ata entón se recorría ós vellos monumentos soamente para ratificalo sabido por outras vías, e o resto arqueolóxico aparecía entón como accesorio ilustrativo do que escribiran os clásicos, Murguía manifesta unha prístina vontade de liberarse desa restrictiva convicción e, daquela, de comezar a facer verdadeira arqueoloxía. Como veremos, non sempre conseguirá o pretendido, tendo que se enfrontar, na práctica, a arduas dificultades. Pero o simple feito de asumir esta posibilidade marca, de seu, unha considerable ruptura.