BOLETÍN DA REAL ACADEMIA GALEGA
Estudos e investigacións sobre Xosé María Álvarez Blázquez
Álvarez Blázquez saudou con ledicia a iniciativa do P. Aguirre de converter, co apoio do concello do Porriño, parte do escavado nun museo de sitio, no que se podería contemplar o taller de talla asoellado, xunto cos instrumentos del saídos, ao modo do que se tiña feito no xacemento de Torralba, en Soria. Pronto a ledicia se trocaría en decepción ao non realizarse o proxecto. Unha outra importante achega ao coñecemento da prehistoria galega na que participou Álvarez Blázquez é, sen dúbida, a descuberta da cista e enxoval de Atios. Nesta freguesía do Porriño e no lugar de Tunés, ao achanzar un terreo, no verán de 1967, deuse cun enterramento en cista que acubillaba un interesante enxoval. Do achado dáse conta ao noso autor, quen acomete a súa escavación de urxencia, que fornecerá dous puñais de cobre, dous pequenos cilindros, de 2,9 e 2,3 cm de diámetro, de finísima lámina de ouro con decoración ondulada en entrantes e saíntes horizontais e un arame espiraliforme en cilindro, de sección romboidal, de prata, de 1,5 cm de altura e 2,1 de diámetro. A importancia do enterramento viña dada tanto polo espolio, como polo feito de estar aquel intacto. No ángulo N.O. da cista situábase unha pedra de seixo, que podería indicar a cabeceira do sepulcro. Con algúns paralelos en Galiza e na fachada atlántica, os materiais e o xácigo poden enmarcarse nun horizonte cronolóxico correspondente ao Bronce Inicial (18001500 a. de C.), momento no que as relacións con outras fisterras do atlántico europeo son xa evidentes e darán lugar a interesantes afinidades culturais (Álvarez Blázquez, Acuña Castroviejo, García Martínez, 1970). No ámbito da cultura castrexa non son moitos os traballos de Xosé María, pero si significativos, xa que proporcionan informacións sobre xacementos descoñecidos ou pouco tratados nos que fixo intervencións a principios dos anos 30 e dos que nos deixou uns diarios de escavación que, en parte, reflicten as normas de catalogación que por entón o SEG promulgara (Nós 1927). Xa en 1933 intervén con Fernández Costas en Cabeza de Francos (Pazos de Rei, Tui), un castro próximo ao monte Aloia que algúns autores quixeron identificar co famoso monte Medulio. Alí recuperou un abondoso espolio, depositado daquela no Instituto de Segunda Ensinanza de Tui, que a partir dos debuxos e dos textos leva a unha época romana. Por certo, este xacemento foi visitado por Mergelina, o que amosa os contactos que tiña cos arqueólogos da época (Mergelina, 19441945). No ano 1934 realiza unhas calicatas no castro da Guía, atopando algúns materiais dos que pola descrición que fai non podemos saber a súa cronoloxía (Álvarez Blázquez, 1935). E no mesmo ano intervén máis profundamente no castro de San Xoán de Baión (Vilanova de Arousa) segundo se traduce dun informe, agora recuperado, no que xunto a algún dos seus irmáns Alfonso, Emilio e Álvaro, e a Celso García de la Riega, fillo, recupera un considerable conxunto de pezas líticas e cerámicas que polas descricións que fai e ante a falla de debuxos, podemos considerar de época romana. Resulta interesante comprobar como Xosé María leva o espírito do SEG cando amosa a súa disposición a
Nº 369 140