Estudos e investigacións sobre Manuel Lugrís Freire
BOLETÍN DA REAL ACADEMIA GALEGA
Exaltación de Galiza e dos galegos No teatro de Manuel Lugrís Freire, a enxebreza é unha das condicións necesarias do bo galego, sendo enxebre ?un gallego que non renega de sí mesmo, e que, sin interés nin condiciós, ama todo o que Dios lle deixou en herdo? (Lugrís Freire 1917: 23). Este parlamento de Pedro lévanos ao centro doutra das teimas constantes na actividade cultural de Lugrís. En efecto, é esta unha liña patente en todas as fases que caracterizan o seu teatro, e de feito o conxunto da súa obra. Así, na fase cubana da súa escrita dramática deberemos contar tanto De Galicia á Lavapiés como A costureira d'aldea sobre a que Vieites (2006a: 67) sinala que é:
unha obra creada coa finalidade de prestixiar a lingua e a cultura galegas a través da exemplificación de casos cos que mostrar e demostrar actitudes, valores, principios e normas, entendendo que o escenario non só era unha tribuna senón que o teatro se podía converter en escola.
E, como xa apuntamos, Teresa López considera que esta obra ten unha clara finalidade de afirmación do galego e de Galiza que se fai ?desde a explicación da diferenza e como defensa fronte á aldraxe? (2006b: 76). En realidade, como esta mesma profesora apunta e xa tiñan indicado todos os estudosos das obras de teatro do período rexionalista (Pillado Mayor, Tato 1999, Vieites 2003 e 2005...), Galiza, os galegos e a súa lingua é unha das maiores preocupacións desde a mocidade de Lugrís Freire, e todos os seus dramas perseguen a dignificación mediante a presentación de personaxes nobres, cheos de virtudes e sempre orgullosos da terra en que naceron, daquilo que os conforma. CARÁCTER PEDAGÓXICO E CONSTRUCIÓN REXIONAL/NACIONAL Para entendermos a relevancia de Lugrís, diciamos que cumpría termos en conta varias circunstancias: o xénero dramático foi a parte da súa obra máis recoñecida, tanto pola novidade estética que supuxo como pola importancia que as súas obras e as mensaxes nelas transmitidas, tiveran na Galiza da época. Porén, en realidade o teatro de Lugrís é unha face máis do poliedro de actividades que este autor desenvolveu durante toda a súa vida. En efecto, en Lugrís, ?home que dedicou os mellores anos da súa vida a traballar activamente a prol da recuperación cultural e política da Galiza?, poderemos ver un
Contertulio da Cova Céltica, membro da Directiva do Centro Galego da Habana, da de Aires da Miña Terra23, promotor e presidente da Escola Rexional de Declamación, fundador ?e logo presidente? da Academia Galega, fundador da Liga Gallega, da Asociación da Prensa da Coruña, de Solidaridad Gallega, das Irmandades da Fala, membro do Seminário de Estudos Galegos, do Partido Galeguista, redactor en 1932 do anteproxecto de Estatuto de Autonomia, home comprometido co ideário republicano... (López 2006: 9)
95
Nº 367