BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
aldeán, presentando a oposición dicotómica de que xa falamos, cun espazo latente, o da cidade, que inflúe nos personaxes de diferentes formas. En relación con isto, Vieites (2006a: 47) fala noutro traballo da visión romántica da cultura tradicional e popular. Esta visión romántica correspóndese coa asunción dunha serie de valores que, a partir do período da configuración nacional en Europa ?desde finais do século XVIII?, se converten en eixos fundamentais da nova estruturación social. En efecto, o paso dos Antigos Réximes aos novos sistemas en nacións (Anderson 1996) constitúese mediante a recuperación das esencias nacionais que, en moitos casos, radican no menos contaminado e deturpado estamento popular, gardador/conservador da lingua, das tradicións, da arquitectura, da literatura oral... elementos que nese momento se consideran particulares e diferenciadores dos diferentes colectivos que aspiran a ser ou son nacionais (Thiesse 2001). Unha particular excepción sería quizais o caso d'A Ponte onde a cidade ten un sentido novo:
Se no campo están os homes e mulleres nos que se gardan e conservan as verdadeiras eséncias de Galiza, é da cidade, parece ser, de onde deben emanar e proceder as ideas libertadoras e redencionistas para noso pobo. O ideal Rexionalista, só poderá triunfar, parece pensar Lugrís Freire, o día en que, na Galiza, se multipliquen os mozos como Antón. (Pillado Mayor 1991: 78)
Non parece casualidade que a influencia positiva da cidade apareza no drama de máis marcado carácter social, moi ligado ao pensamento rexionalista pero aínda non influenciado definitivamente por un pensamento de carácter nacionalista. Fronte a esta perspectiva renovadora das ideas socialistas chegadas da cidade, concretamente da Coruña con Antón, a cidade terá un significado fundamentalmente negativo no resto do seu teatro, principalmente n'O Pazo. Neste sentido, destaca o personaxe de Micaela, que chega da Coruña vestida ?como as modistas da Cruña?, desgaleguizada mediante a imitación das modas da cidade e o abandono da lingua por un castrapo ridículo. Nesta ocasión, a aldea servirá de símbolo metonímico da Galiza verdadeira e será o lugar edénico de convivencia e desenvolvemento dos galegos, como apunta Pedro ao afirmar:
Neste curruncho da Mariña hay algo que vale mais que todalas ciudades, por boniteiras e ricas que seian. Aló, na vila, hai falta d'enxebreza, algo estrano que nos magóa, como si viviramos lonxe da terra; aquí nestes humildosos currunchiños inda s'alcontram, para solaz da yalma e para amainar a nosa saudade patriótica, esa soma doce, meiga, querendosa que nos fala da santa e nunca esquecida Galicia. (1917: 23)
Polo demais, en moitas das outras pezas a cidade aparece tamén tratada de forma pexorativa, connotación que procede fundamentalmente da relación que os caciquesabusadores teñen con elas e coa clase política que nelas actúa. Fronte a isto, segue a resultar moi curioso e moi interesante o personaxe de Antón, capaz de traer influencias positivas da cidade e así mesmo de desligarse da terra, tanto para vivir na Coruña como para marchar emigrado, á procura dun mundo máis xusto.
Nº 367 94