Vida oficial da RAG
BOLETÍN DA REAL ACADEMIA GALEGA
b) Biblioteca Emilia Pardo Bazán: incorporación de cento noventa e seis folletos que se incorporaron despois da catalogación efectuada no ano 2005. c) Nesta mesma biblioteca, incorporáronse 450 volumes procedentes de fondos deteriorados e que foi posible restaurar. Na Hemeroteca incrementouse de maneira importante o servizo aos usuarios xa que ás numerosas consultas presenciais temos que engadir as efectuadas telefonicamente e por correo electrónico debido en parte ao bo funcionamento da páxina web da Real Academia Galega, perfectamente actualizada. Na hemeroteca, completada xa a catalogación das publicacións periódicas galegas e todas as cabeceiras ?abertas?, estase a proceder á catalogación das publicacións periódicas cerradas non galegas localizadas nunha das salas do soto. Incrementouse tamén de maneira notable o número de intercambios de publicacións periódicas con institucións de distintas cidades e países. A normativa vixente a respecto do pedimento de reprodución de fondos está tamén xestionada informaticamente. A xestión e cesión de fondos hemerográficos para a exposición conmemorativa do centenario da Real Academia Galega, que acaba de clausurarse, foron efectuados con eficacia polos servizos da hemeroteca. ARQUIVO Creado en 1905. Director: D. Antonio Gil Merino (desde o 17 de decembro de 2005 ocupou o cargo D. Xosé Luís Axeitos Agrelo). Financiamento: Consellería de Cultura, Comunicación Social e Turismo. Traballos desenvoltos: O notable incremento dos usuarios do arquivo Real Academia Galega está en relación directa coa boa marcha da informatización dos seus fondos, iniciada hai poucos anos. Foron un total de 125 investigadores os que se achegaron á rúa Tabernas para realizar diversas consultas, número que se duplica se engadimos as numerosas consultas telefónicas e por correo electrónico. Os fondos documentais tiveron novas entradas, unhas procedentes de compra e outras de doazón. Entre as primeiras podemos salientar: Libro de contas da Capela Branca, Cofradía de Todos os Santos (A Coruña), Documentación de Meixide Pardo, da familia González de la Ribera Hidalgo, Obra ms. de R. Caula, Diversa documentación empresarial, ademais de catro carpetas que conteñen diversos documentos históricos pendentes de catalogación. Entre as doazóns figura diversa documentación empresarial (Fábrica de xeo da Palloza, doada por D. S. González López), orixinais impresos da homenaxe a Curros Enríquez (D. F. Maciñeira Teijeiro), cartas referidas á Real Academia Galega (D. Ricardo Martínez), reportaxe fotográfica da entrada do escritor e académico xa falecido Manuel María (dona M. Roca Cendón), dous vídeos doados por Televisión de Galicia relativos ao Día das Letras Galegas e diversos recortes de prensa de tema histórico doados polo Sr. Rodríguez Maneiro e unha fotocopia da académica Luz Pozo Garza. Temos que salientar tamén a cesión en depósito dos interesantes manuscritos autógrafos do escritor Luís Manteiga, efectuada pola familia CameoLorenzo.
307 Nº 367