Estudos e investigacións sobre Xaquín Lorenzo Fernández
BOLETÍN DA REAL ACADEMIA GALEGA
QUEIMARLLE A PELICA Como no noso conto, sucede a miúdo que, para lograr o desencantamento, un dos membros da parella queime a pel do animal que recobre o outro. Esa incineración da pel representa, no plano simbólico, a purificación do encantamento, e, no plano psicolóxico e relacional, a superación dos defectos do personaxe. A nai de «O fillo serpe», para desencantar o rapaz, dille á nora: ?Esta noite acenderemos o forno, e cando esteas con el na cama e vexas que xa quedou durmido, achegareiche o atizador desde arriba; colga nel a súa pel de serpe e eu tirarei cara arriba, sacareina do barril de fermentación e botareina no forno para que se queime?. Así o fixeron. Á mañá seguinte, ao non atopar a súa pel para meterse nela, o rapaz saíu do barril de fermentación e de alí en diante viviu na súa casa como as demais persoas (DIEDERICHS agosto 14; véxase outubro 15; xullo 51; febreiro 93). «A galiña lavandeira» narra a historia dunha rapaza que se transforma en galiña. Vea un príncipe, lévaa ao palacio e prepáralle un niño nunha cesta xunto á súa cama. E pola noite foi bailar. A galiña esperou a que saíra, logo sacudiu as plumas, converteuse nunha moza e tamén ela correu ao baile. Cando entrou na festa, o fillo do rei recoñeceuna ao momento e saíu correndo. Chegou á casa, foi mirar na cesta, encontrou as plumas da galliña e tirounas no lume. Despois volveu á festa e bailou coa moza finxindo que non a recoñecía. Regresou á casa tarde, e a galiña aínda non estaba. O fillo do rei deitouse e finxiu durmir. Entón viu que a moza entraba ao xeitiño, nas puntas dos pés, e crendo que ninguén a vía ía en busca das plumas. Acercouse á cesta e as plumas non estaban. Mirou ao redor espantada, e niso o fillo do rei ergueuse e abrazouna dicindo: ?¡Agora casarás comigo!? (CALVINO 546; véxase 3189). O protagonista de «A rapaza pomba», agachado nunha fonte, observa cómo varias pombas, entre as que estaba a súa amada, deixan os vestidos e se meten na auga. Entón saíu do agocho e apoderouse do vestido. ?¡Dáme o vestido! ¡Dáme o vestido!?, empezou a berrar a rapaza. Pero o mozo prendeulle lume e queimouno. ?Si ?dixo a doncela?, agora quedarei contigo e serei a túa muller? (CALVINO 737).
ANTES DE TEMPO A pesar dos exemplos anteriores, a queima da pel, como sucede no noso conto, non sempre supón o final do encantamento. E non sempre acaba co problema porque en moitos casos o cónxuxe do monstro precipítase, executa o rito de desencantamento antes de tempo. Esa precipitación provoca o distanciamento na parella. Cabe interpretar que o fallo radica en pretender que a persoa encantada, a persoa con defectos, os supere en pouco tempo.
205 Nº 365