BOLETÍN DA REAL ACADEMIA GALEGA
Estudos e investigacións sobre Xaquín Lorenzo Fernández
Nalgunhas versións a que lle queima a pel é súa nai, a raíña: ?Ao outro día ergueuse o príncipe e vestiu outra vez as sete camisas de lagarto. E pola mañá a sogra, cando viu que Mariquiña durmira con el e non a matara, preguntoulle como era o lagarto de noite. E Mariquiña contoulle o que pasara. E a sogra díxolle entón que ela quería ver o seu fillo sen as camisas de lagarto, como home, e díxolle que esa noite deixara a porta do cuarto aberta para velo. E chegou a noite e pasou o mesmo que a noite anterior. Chegou o lagarto a media noite, atopou a Mariquiña esperta e quitou as sete camisas de lagarto e quedou un fermoso príncipe e deitouse coa muller. E a noiva deixou a porta entreaberta para que a sogra puidese ver o seu fillo como home. E chegou a sogra cando o príncipe estaba durmido e viuno. E cando viu as sete camisas sobre a cadeira colleunas e queimounas. E ao día seguinte cando se ergueu o príncipe e cando viu que non estaban as súas sete camisas de lagarto díxolle á súa muller que agora estaba máis metido no encanto e que tiña que ir ao Castelo de Irás e non Volverás, e que para chegar a atopalo tería que marchar moito tempo e gastar sete pares de zapatos de ferro e outros tantos o seu neno? (CAMARENA 242). En «Unha cabeza» a traxedia provócaa a madrasta da moza. A protagonista está casada cun rapaz que é só unha cabeza. O monstro advírtelle que se lle desvela a alguén o seu segredo, marchará en forma de pomba. A madrasta da rapaza, desexosa de coñecer o misterio, emborráchaa, e ela revela que as pernas do seu marido son de prata, os brazos de ouro e que leva unha estrela no cabelo, un sol na testa e unha lúa na caluga. Ao oíla, o esposo rompe o cristal da ventá e sae voando cara ao sur. En canto lle pasou a borracheira, a esposa empezou a buscar o seu marido, pero este desaparecera. Entón saíu na súa busca e viaxou sete anos en un (DIEDERICHS febreiro 34). Outras veces é a propia esposa quen lle queima a pel. Violeta, unha fermosa doncela, acepta casar co protagonista de «O príncipe sapo pide esposa». E celébrase a voda. Cando quedaron os noivos sós, Sapiño quitou a pel de sapo que o cubría e apareceu un real mozo coma un castelo, fermoso e lanzal que daba gusto velo. Violeta alegrouse moito disto; pero da alegría non puido calar, e contoullo á raíña á mañá seguinte, aconsellándolle esta que, cando estivese deitado, collese a pel de sapo e a queimase, para que así tivese que quedar sempre de mozo á forza. Chegou a noite seguinte, e Violeta, que estaba desexando que chegase para queimar a pel, díxolle ao seu esposo que se deitase, que ela tiña que amasar. Deitouse Sapiño, e cando Violeta o viu durmido, fixo unha boa fogueira e queimou a horrible pel; pero, ao arder, a pel facía ruído, e Sapiño espertou, preguntándolle a ela que facía; moi contenta, contestoulle que queimándolle a pel, para que así sempre seguise en forma de mozo tan baril e aposto. Pero Sapiño, moi triste, díxolle: ?Pois matáchesme sen querer; só me faltaban tres días para saír do encanto porque achara unha muller que me quería, e es ti, e así me mataches? (CAMARENA 300. Véxase OLIVEIRA 637).
Nº 365 206