Estudos e investigacións sobre Manuel Lugrís Freire
BOLETÍN DA REAL ACADEMIA GALEGA
Marcha para o Caribe no ano 1883, dentro da breve e tranquila paréntese entre guerras, recente aínda a chamada Paz de Zanjón, que puxera fin á Guerra dos Dez Anos, entre a nostalxia e o profundo amor á súa nai, do que se fai eco en moitas composicións dos seus primeiros poemarios. Cando arriba á ?Perla de las Antillas? séntese transportado a outro mundo. A cidade luminosa, a melura das súas xentes, o ambiente cosmopolita e as enormes contradicións entre os galegos residentes, crean en Lugrís un profundo sentimento de autoafirmación patriótica e arelas, cada vez máis ardidas, de redención. Reclamado polo seu irmán Plácido, que emigrara anos antes e que non retornará xamais a Galicia, pois morre na illa en 1927, co que ten bastantes concorrencias e tamén diverxencias de carácter encontrado, como moitos outros dos nosos devanceiros, na análise e conceptuación sobre a verdade da súa Terra. Porén, manterá sempre unha liña de amor fraterno explícito con el como pode colixirse a través de varios poemas, así como do conto ?A Espada do Fidalgo?, que lle dedica con total devoción. Na Habana colonial atópase, de súpeto, coa miseria dos fracasados, coa vilanaxe dos que fixeran cartos, co mundo da cultura con todas as reivindicacións que foran as súas angueiras agochadas na incomprensión e na impotencia que o apreman en Galicia pero que agora, xorden vigorosas na esperanza de se realizaren. Aquel mosaico de xentes constitúe o seu primeiro cruxol de realidades que máis tarde tratará de plasmar nos dramas de costumes, facendo unha translación virtual do xeral ao particular da vida en Galicia. A súa actividade pública dá comezo nada máis chegar. Colabora, de inmediato en El Eco de Galicia que dirixe Waldo Álvarez Insua publicando, sobre todo, poesía, como a súa primeira composición ?Nostalxia? e tamén a novela curta ?O Penedo do Crime?, co alcume de L.U.Gris, téndose noticia por este medio comunicativo, da lectura da obra teatral A Costureira d'Aldea, comedia de costumes en verso octosilábico dun só acto, con certo aire reivindicativo, escrita en colaboración co seu irmán Placido e tamén asinada co devandito pseudónimo de L.U.Gris, que tiña pensado levar á escena pola Sección de Declamación do Centro Galego, o que finalmente non sucede chegando soamente aos ensaios. Mais si consegue que sexa representado o seu apropósito líricodramático, De Galicia a Lavapiés como resposta a un esperpento literario que co mesmo título invertido, estaba a pór en ridículo a idiosincrasia e o carácter dos galegos. Traba amizade con Curros Enríquez, figura que treita en varias composicións do poemario Soidades, publicado na Habana en 1894 e prologado polo propio Curros, a súa ópera prima literaria que contén a composición ?Eu son galego?, moi celebrada entre os coetáneos da colonia, transposición dun ronsel de sentimentos espontáneos que se están a sementar dentro del nos versos que se desenvolven nas páxinas do libro. Versos que van esparexendo a configuración do microcosmos que se enceta na casa de Soñeiro, deixada alén do mar, e que remata nas ilusións daquel fato de emigrados que forman a súa entraña patriótica na illa caribeña. Aos que, por certo, non esquece á hora de publicar, xa que logo, deixa cons61 Nº 367