Estudos e investigacións sobre Manuel Lugrís Freire
BOLETÍN DA REAL ACADEMIA GALEGA
Mariñas? (Lugrís Freire 1919: 2). Volvemos desta vez encontrar sete personaxes, dúas mulleres e cinco homes cuxa primeira descrición é de idade. Para alén diso, chama a atención prestada nesta comedia ao vestiario, como reflexo da situación socioeconómica dos personaxes. Así podemos ver que a protagonista Rosa ?vestirá con aire señoriteiro e serio, propio d'unha artesana acomodada?, Toniño e Bastián ?levarán traxes mariñeiros como agora s'estilan, con chaqueta ou americana enriba d'un jersey? ou Gorecho ?vestirá á estilo de mariñeiro vello, blusa, pantalón de tarazona, faixa, boina oscura, etc.? (1919: 2). Toda a crítica apunta a pouca consistencia dramática da peza, que tamén sofre dun excesivo estatismo e narratividade. Abuín e Ruibal (2006: 25) comentan sobre o asunto da peza:
A pesar do acoso de Bastián, un mariñeiro rico, Rosa garda na lembranza o seu amado Xurxo, cuxo barco fora bombardeado por un submarino dous meses antes. Xurxo, aparécese repetidas veces aos veciños da vila como «alma en pena» e visión pantasmal (?estadea?). En realidade, trátase dunha estrataxema de Toniño, irmán de Xurxo, que se descubre cando este volve por fin para recobrar a ledicia da súa querida Rosa. Os personaxes de Estadeíña viven obsesionados pola presenza de fantásticas aparicións ou gobernan as súas vidas polos signos premonitorios da natureza.
En efecto, alén do asunto amoroso, o tema principal desta peza xira arredor da obsesión popular polas supersticións, as crenzas que, como xa acontecía coa personaxe de Sabela n'A Ponte, impiden a acción ou a reflexión nos medios para loitar contra as situacións de penuria ou inxustiza que sofre o pobo, sendo Antón no caso d'A Ponte ou, en menor medida, Martiño en Estadeiña, os voceiros destas opinións. Como características comúns destas últimas propostas teatrais de Lugrís Freire poderemos apuntar, sen dúbida, o seu carácter cómico e o resultado feliz das relacións amorosas. Así mesmo, observamos como a acción se centra en comunidades harmoniosas que encarnan as esencias galegas e a posibilidade de futuro dunha Galiza nova, sempre que sexa quen de encarar os novos tempos, con ideas renovadas e limpas das inercias que manteñen o país sumido no atraso, ou que case o converten ?nunha ínsua de Ocealandría? como afirma Mingos no inicio de O Pazo (1917: 6). Por último, cremos que a conformación de unha nova identidade galega, moderna e nacional pode ser outro trazo subxacente aos dous textos, perspectiva nova que explicaría a elección da comedia como xénero, ao permitir a relación fraternal, conciliadora e harmoniosa dos diferentes colectivos que a comporán17. Aínda que interesado polo teatro, Manuel Lugrís Freire non volvería dedicarse á escrita teatral a partir da redacción de Esclavitú. Mais o seu labor máis significativo xa fora feito durante as dúas décadas anteriores, desenvolvendo un corpus dramático onde apostou por novidades e temas pouco transitados até ese momento na escrita dramática. Vexamos xa que logo, algunhas desas características máis salientábeis.
89 Nº 367