86
BOLETÍN DA REAL ACADEMIA GALEGA
unión non chegase durante a Guerra de Sucesión (p. 166). Isto concorda coa pouca entidade do referente de negaciónoposición, que só presenta algúns gromos na faceta de pura negación ?algo inevitable dada a plenitude do referente afirmativo? como, por exemplo, cando insinúa que os ingleses e outros pobos de estirpe celta poderían ser menos estranxeiros para os galegos cós casteláns (p. 11), ou a explicación étnica que dá ás diferencias que atopa entre a literatura galega e a castelá (1856a). Pero estes gromos illados fican de momento escurecidos polas reiteradas mencións da pertenza de Galicia á nación española (p. XX, 148, 181). Incluso a síndrome da aldraxe ten nel moi contadas manifestacións e, dende logo, a faceta opositiva, respecto de España ou de Castela, manifesta unha atrofia que contrasta vivamente co vigor que comprobamos nas obras coetáneas da súa esposa Rosalía de Castro. En resumo, podemos concluír que no primeiro concepto murguiano de Galicia hai unha forte tensión entre a afirmación dos factores constitutivos dunha nacionalidade galega histórica e obxectivamente definida, por un lado, e a pervivencia da idea provincialista dunha nación española de esencia política perfectible e na que Galicia está incluída, polo outro. Esta pervivencia é a que inhibe o desenvolvemento dos referentes de negación e reintegración. O difícil equilibrio entre eses dous conxuntos contradictorios de elementos ideolóxicos romperá a favor do primeiro na fase rexionalista. A MADURACIÓN IDEOLÓXICA Entre o final do período isabelino e a década dos oitenta, as experiencias políticas nas que participa do lado dos finalmente perdedores (revolución de 1868, réxime democrático da Constitución de 1869, I República e I Restauración), xunto a moitos e graves avatares profesionais e persoais, inducen sen dúbida na súa ideoloxía certos cambios non radicais pero tampouco insignificantes. Hai indicios do seu desencanto co rumbo da experiencia democrática xa en 1870 (F. Rodríguez, 1988, p. 9293) e a chegada e consolidación da Restauración suporá para el unha dura lección, e non só ideolóxica, que o afastará cada vez máis do seu radicalismo xuvenil. Como veremos axiña, a evolución do seu pensamento, que articula a definición de todo o rexionalismo galego e domina totalmente a súa corrente liberal, segue dúas liñas complementarias: a