90
BOLETÍN DA REAL ACADEMIA GALEGA
los. Dito doutro modo, non impide que os caracteres definidores e diferenciadores das comunidades, unha vez etnicamente constituídas, se manteñan esencialmente inalterables, malia as transformacións económicas, sociais e políticas: ?Todo lo que se refiere á las costumbres tiene en los pueblos una duración que sorprende; á distancia de siglos á penas se ve que cambien en cuanto les es privativo ó puramente necesario? (1882a, p. 42). Por iso afirma que a diversidade nacional é unha característica xeral da historia imposible de destruír (1886c). E pode afirmalo gracias a que considera que a diferenciación nacional, mesmo o propio ser nacional, nada ten que ver co sociopolítico, é dicir, co histórico continxente, senón que nace de fontes independentes desas continxencias: a raza que, en conxunción co territorio, xera un carácter colectivo e un idioma específicos e irreductibles. Velaí o compoñente estático e organicista do seu historicismo, que se resume nun concepto xeral de nación que analizaremos despois. A terceira é que esa evolución histórica necesaria, que cambia o económico e o sociopolítico pero non o nacional, cando chega á modernidade só resolve nos primeiros momentos a cuestión das liberdades individuais, en parte porque os homes, na súa loita contra o feudalismo, se guiaron pola soa razón e menosprezaron a historia e todo o que esta creara de bo e conservable. Por fortuna, este erro empezaba a corrixirse, proceso que permitiría culminalo verdadeiro progreso político, que concede tanta importancia á liberdade dos individuos como á liberdade colectiva ?nacional? dos organismos históricos naturais. Isto explica ?e xustifica? o crecente vigor dos nacionalismos referidos a nacións orgánicas, e non a Estados. Estas nacións son, xa que logo, axentes necesarios para que liberdade e progreso acaden toda a súa plenitude. Por tal razón os rexionalismos non son movementos retrógrados senón que, moi ó contrario, con eles ?entramos en la renovación de los pueblos enteramente modernos? (1886c). Aquí témolo punto de articulación do historicismo de Murguía co seu liberalismo. Partindo destes supostos a nación tiña que ser para el o suxeito histórico principal. Toda a historia, e moi especialmente a contemporánea, non é só a da loita dos homes para conquistala liberdade en canto persoas, senón tamén, e tanto ou máis, a dos esforzos das etnonacións por lograla súa. Resulta, pois, de grande interese para nós determinar coa maior precisión posible qué concepto xeral de nación utilizaba.