BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
Por outro lado Lugrís exercita tamén a crítica corrosiva e ridiculizadora nunha serie que viu a luz en Galicia Moderna [...] precedido dunhas prosas nas que Lugrís explica que está a rematar a historia do que el denomina ?O Lechuceiro?, unha serie na que facendo uso do recurso do orixinal atopado erixe unha visión cómica da biobibliografía de Waldo Álvarez Insua, dun xeito pouco disimulado para que os lectores se decatasen de quen estaba realmente a explicarse. O aguillón ou ferrete crítico do sadense inscríbese na mellor das tradicións críticas e caricaturescas facendo uso do manuscrito dun amigo seu ?O Moucho que el se limita a reproducir a través do que relata a accidentada vida do ?Lechuceiro?, alcumado como mal poeta [...] mariñeiro que naufraga, pintor, profesor, cómico, can, gacetilleiro no ?Eco da Sopa? (por Eco de Galicia) até dar coa descrición das algueiradas que organiza para conseguir postos cobizados no Centro Gallego da Habana.60
E xa como última referencia importante en canto ás obras publicadas durante o 2006 cómpre mencionar o libro Manuel Lugrís Freire: A fe na causa61 de Xosé Manuel Fernández Costas xa que ofrece amplos resumos argumentais de cada un dos textos narrativos que asinou Lugrís, así como descricións do proceso de publicación de que foron obxecto. Con respecto á narrativa breve, opina Fernández Costas o que reproducimos nestas liñas:
A maioría dos contos están localizados na zona das Mariñas de Sada. Algúns outros localízanse na Coruña, outros nas Rías Baixas. Os ambientes son de diversa fasquía: hainos campesiños, urbanos, mariños e tamén atopamos relacións de campesiños con avogados, fidalgos, de mariñeiros. Case todos teñen unha intencionalidade educativa ou con sentenza, é dicir, pretenden facer reflexionar aos lectores ou lectoras sobre a vida dos personaxes que interveñen. Sen esquecer o fin último que é valorar todo o que ten que ver co mundo enxebre galego, como algo que debe ser coidado e valorado positivamente. Do mesmo xeito debemos valorar, diría Lugrís, os feitos realizados por personaxes históricos ou míticos ou inventados que quere utilizar como símbolo do que se debe facer para redimir o país, tendo como principal elemento e fío condutor a lingua. Aínda que moitos estean localizados en épocas históricas recuadas, todos poden ser trasladados á época actual do autor e aos seus asuntos e problemas.62
CONCLUSIÓNS Á vista do exposto nas páxinas anteriores podemos concluír que a produción narrativa de Lugrís estivo condicionada, durante boa parte da súa vida como escritor, por circunstancias externas ao propio proceso da creación literaria. Así, constatamos que durante o século XIX foron as amizades do autor as que condicionaron a publicación dos textos nun ou noutro medio escrito, alén de motivar a escrita doutros textos, mentres que no devir do século XX foi a ideoloxía política agrarista e galeguista o condicionante principal de boa parte dos seus relatos. Evidénciase, ademais, unha notoria riqueza de elementos paratextuais, nada excepcionais na literatura galega do momento, que axudan a entender mellor o corpus narrativo lugrisiano. En canto á recepción dos textos de Lugrís, detéctase un case absoluto esquecemento durante os primeiros anos, os máis duros da ditadura, e unha progresiva recuperación a partir de 1970, salientando especialmente todos os estudos publicados ao abeiro da dedicatoria do Día das Letras Galegas do ano 2006.
Nº 367 54