Estudos e investigacións sobre Manuel Lugrís Freire
BOLETÍN DA REAL ACADEMIA GALEGA
Para a narrativa breve, ten Hermida estas consideracións:
Esta narrativa de Manuel Lugrís Freire, que efectivamente ten moito de literatura propagandística e que non resulta de todo coherente, pola carencia de concordancia entre a intencionalidade do autor ?que a desexa didacticamente popular e as marcas ideolóxicas ou os formalismos literarios dos que non dá fuxido, hai que recoñecer que non resulta tan carente de valores literarios como ten anotado Ricardo Carballo Calero.
Sen dúbida, foi o ano 2006 o máis prolífico en canto aos estudos dos diferentes aspectos da vida e da obra de Manuel Lugrís Freire grazas á dedicatoria do Día das Letras Galegas, e, xa que logo, foi tamén neste ano cando máis opinións se verteron sobre a súa obra narrativa. Así, Henrique Rabuñal en Manuel Lugrís Freire56 expresa o seguinte d'O penedo do crime:
Organizada en once breves capítulos conta como en 1790 un pai ordena matar ao seu fillo nacido da súa relación cunha rapaza pobre. O crime non se consuma e dezaoito anos despois aquel fillo chega a coñecer a súa nai pero resulta morto, agora si, polo seu pai quen acaba suicidándose.
No volume antedito, Rabuñal, tamén dedica unhas liñas aos Contos de Asieumedre:
Trátase de textos de vocación galeguista e intención popular xa publicados en A Nosa Terra. Son textos breves, situados por veces na comarca sadense, cheos de sabor popular, con defensas da propia lingua, críticas á inxustiza, denuncia da exclusión e a pobreza, defensa do traballo, imitacións de fábulas que defenden a liberdade e censuran a tiranía antidemocrática, moito humor, certa teima antiandaluza e mesmo unha homenaxe a Fernán Pérez de Andrade.57
Outra obra de referencia xurdida no 2006 foi Manuel Lugrís Freire. Vida e obra58de Ramón Nicolás Rodríguez, na que se dedica un espazo considerábel ao estudo e descrición da narrativa lugrisiana. Con respecto aos textos publicados baixo o epígrafe ?A carón do lar?, afirma Nicolás o seguinte:
Este último título (...) sitúanos, indefectiblemente, preto da tradición da narración oral e popular e, malia que tematicamente os contos sexan de índole variada, neles resulta tamén determinante o afán instrutivo, pedagóxico e moralizante por veces. A temática dos relatos é, en efecto, heteroxénea. (...) A heteroxeneidade temática é un lugar común neste libro e resulta salientable, entre outros aspectos, o tratamento denunciador que fai da figura dos caciques, e por extensión da situación miserable na que resiste o campesiño; a intelixencia que amosan os vellos petrucios, cheos de sabedoría e, desde logo, a constante defensa da lingua galega, xunto con certo anticlericalismo ?que non sentimento antirelixioso ou aqueles sucedidos vinculados co exercicio das máis diversas profesións. Tecnicamente é abondoso o uso do autor omnisciente convencional ou a primeira persoa, sexa testemuña ou protagonista cun artellamento técnico marcado pola sinxeleza.59
Non engade nada novo Nicolás con respecto a O penedo do crime, pero si o fai ao comentar o relato ?O lechuceiro (conto cómicobufo)?, un texto do que ninguén dera novas anteriormente e que o estudoso antedito comenta con estas palabras:
53 Nº 367