BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
Estudo biográfico bastante acertado, aínda que menos completo que o de Dobarro é o que nos presenta Alfonso González Catoyra no seu volume Biografías coruñesas53, onde, malia a esquecer novamente a novela de Lugrís, comenta que:
Con el título de Contos de Asieumedre, seudónimo con el que firmaba en algunas revistas gallegas, nos dejó un serie de cuentos en los que se revela el sentido sagaz, humorístico y a veces satírico de su ingenio. Son cuentos sencillos, no exentos de doble sentido del amor a la tierra y su lengua, que le valieron una gran popularidad.
Xa máis recentemente, cómpre mencionar o Diccionario da Literatura Galega Autores I54que, malia arrastrar de volumes semellantes anteriores o esquecemento d'O penedo do crime, dedícalle estas liñas á prosa lugrisiana:
Co pseudónimo ?Asieumedre? ?utilizou tamén o de L.U.Gris asinou varias narracións breves que logo compilou baixo o título Contos de Asieumedre (1909), textos de propaganda rexionalista, de fin didáctico e estilo popular, incluíndo algún dialogado en forma de paso de comedia como o titulado ?Ir por lan?, reproducido en A carón do lar (1970).
A volumosa Historia da literatura galega dirixida por Alberte Ansede e Cesáreo Sánchez, que se publicou por entregas a mediados da década dos noventa case non inclúe referencias á narrativa lugrisiana, priorizando o estudo do teatro e da poesía do noso autor. Só recollemos a seguinte alusión:
Estes continuadores, entre os que cómpre destacar os ourensáns H. Pérez Placer ou F. Álvarez de Nóvoa, e os coruñeses Lugrís Freire, Amor Meilán ou Aurelio Ribalta, teñen o mérito, cando menos, de ampliar ámbitos de uso e de sobrepoñerse ós prexuízos da época, que restrinxían o galego á poesía?.55
Unha referencia imprescindíbel para achegarse á produción narrativa galega da segunda metade do século XIX e primeira década do XX é a obra de Modesto Hermida Narrativa galega: Tempo do Rexurdimento e, no caso da narrativa de Lugrís Freire non é unha excepción, xa que ofrece cumprida referencia bibliográfica das primeiras publicacións de boa parte dos seus textos, especialmente daqueles da primeira época. D'O penedo do crime opina Hermida o que segue:
O primeiro texto narrativo de M. Lugrís Freire do que temos noticia, posiblemente a peza narrativa de maior interese entre as que compoñen a obra deste autor, é aquel que leva por título ?O penedo do crime. Lenda d'as Mariñas?, publicado no ano 1884 en varias entregas no xornal El Eco de Galicia da Habana. A firma que utiliza para esta obra é o pouco prodigado anagrama L.U.Gris. ?O penedo do crime? é unha pequena noveliña en XI breves capítulos máis un epílogo de menos de dez liñas, que trata dunha complexa historia de amor, paixón, crimes non consumados, encontros inesperados e arrepentimentos, e que acaba en suicidio. O tema daría para unha novela de amplo texto, moi do gusto do folletín romántico, de ter empleado o autor a súa presumible capacidade. Nesta obra demostra un bo dominio lingüístico, pero destapa certas limitacións á hora de estructurar certos acontecementos así como a existencia dos personaxes.
Nº 367
52