Traballos de investigación e estudo
BOLETÍN DA REAL ACADEMIA GALEGA
2. AS ACTAS DAS XUNTAS DE GOBERNO E XUNTAS ORDINARIAS. Para cubrir os intervalos informativos que presenta o libro de rexistro houbo que consultar as actas, tanto as das Xuntas Ordinarias tamén chamadas Xunta Xeral ou Plenario como as das Xuntas de Goberno. Nas actas reflíctense as aceptacións das doazóns que os particulares fan á Real Academia Galega, aínda que presentan algunhas limitacións como fonte. En primeiro lugar, hai unha importante lagoa cronolóxica entre os anos 192919392, dos que non se conserva ningunha acta. Ademais, a información que ofrecen é bastante sucinta, limitándose a constatar como moito a doazón, o nome do doador e ao sumo o número de volumes, pero non se sinala ningún tipo de inventario que permita singularizar e identificar estes volumes. 3. BOLETÍN DA REAL ACADEMIA GALEGA. É a publicación oficial da RAG. O Boletín tamén facilita información que complementa a achegada polas outras fontes. Na sección ?Noticias? infórmase das novidades da Academia e, como é lóxico, nela quedan reflectidos os novos ingresos da Biblioteca. O Boletín inicia a súa publicación no ano 1906 e termina en 1980. No ano 2000 retómase a publicación e será a sección que leva por titulo ?Vida Oficial da Academia?, a que recolla as noticias sobre as novidades da Biblioteca. 4. EXPEDIENTES DE DOAZÓNS. Toda a documentación relacionada coa doazón de calquera tipo de ben á RAG agrúpase formando un expediente. Aínda que o contido dos distintos expedientes non sexa sempre o mesmo, os documentos que os forman facilitan, ás veces, datos moi útiles. É o caso dos inventarios de libros doados que forman parte dos expedientes. 5. OS PROPIOS LIBROS. A utilidade da consulta dos libros para a realización deste traballo vén determinada, por unha banda, pola práctica habitual utilizada na Biblioteca que é a de anotar con lapis, no mesmo libro, a súa procedencia. Por outra parte, a mesma instalación dos libros no depósito facilita unha información moi interesante. O costume é que os libros se instalen correlativamente nos estantes, o que permite, ao manterse unidos, a súa identificación, pois as bibliotecas doadas conservaron, aparentemente, a súa unidade ao longo do tempo, sen que os distintos cambios de sede da RAG e os traslados de libros que estes levaron aparellados romperan esta unidade de instalación. O resultado destas indagacións reflíctese na táboa que vai a continuación. Nesta táboa preséntanse ordenadas por ano de ingreso as distintas bibliotecas particulares que foron identificadas.
197 Nº 367