102
BOLETÍN DA REAL ACADEMIA GALEGA
loita durante a Idade Moderna contra o dominio directo do clero regular arredor do reparto da renda agraria. E aquí remata a súa revisión do pasado do país. As súas valoracións das consecuencias que a instauración do Estado liberal tivo para Galicia pertencen en realidade á análise murguiana da actualidade. Respecto dos elementos estructurais socioeconómicos, Murguía non os inclúe no seu concepto de Galicianación, alomenos dun modo estable. Xa vimos que nin sequera o fai co foro, malia cualificalo de ?forma de poseer propia de mi país?. O seu liberalismo impedíalle incorporar á esencia nacional ese ?contrato tan puramente feudal, que tomó forma propia y se encarnó en nuestras costumbres el día mismo en que nació entre nosotros el feudalismo? (1882a, p.13). É claro que, ó contrario cós tradicionalistas, non fai dependela nacionalidade, nin sequera parcialmente, da continuidade dun determinado modo de producción. Só cabería considerar unha posible excepción a esta regra: a exaltación do carácter rural do país. Pero o certo é que a idealización do mundo campesiño non se acompaña nel dunha defensa das relacións de producción precapitalistas nin dun rexeitamento do mundo urbano e industrial, senón todo o contrario, polo que non hai en realidade tal excepción. Para Murguía, ningunha estructura socioeconómica é consubstancial co ser nacional galego. Por último, do que levamos dito, e en especial da súa reconstrucción da historia de Galicia, dedúcese que ningún sistema político é para Murguía elemento constitutivo da nación en si, senón continxencia pasaxeira e cambiante. É certo que aposta por un, o liberaldemocrático, por estimalo máis xusto e beneficioso, pero isto é para el independente dos requisitos de existencia da nación/rexión galega. É certo tamén que a nacionalidade indiscutible de Galicia a move unha e outra vez cara á independencia ou ó autogoberno, pero, na súa opinión, que a consiga ou a perda non implica que pase do ser ó nonser nacional ou viceversa. En consecuencia, Murguía configura o seu referente afirmativo con dous tipos de elementos constitutivos: o principal e case autosuficiente é a etnicidade; o secundario, pero importante sobre todo no conxunto da súa teoría, é a historicidade. En concordancia coa plenitude que ten nel esta afirmación nacional de Galicia, os demais referentes amosan unha evolución paralela.