BOLETÍN DA REAL ACADEMIA GALEGA
Estudos e investigacións sobre Xaquín Lorenzo Fernández
A segunda proba para candidata a esposa consiste en coidar e calmar unha meniña que chora. Debe demostrar, pois, as virtudes maternais que se lle esixen a unha boa nai. E demostra ser unha excelente ama de casa porque coce moito e moi bo pan e amáñase mellor ca ninguén para vendelo. Todo iso servindo de criada un certo tempo, ou sexa, sendo esposa en casa allea, na casa do marido. A versión portuguesa do conto do lagarto recollida por Ataide Oliveira céntrase en explicar como deben ser as relacións entre os esposos e os seus parentes tanto consanguíneos como por alianza. Di o conto que un leñador moi pobre tiña tres fillas. Un día viu no monte un lagarto que lle regalou unha fortuna a cambio do primeiro que atopase ao regresar á casa. E atopou a súa filla máis nova, que aceptou ir vivir co lagarto. Resulta que o lagarto vivía nun espléndido palacio. Pouco tempo despois un paxariño avisou a moza de que ía casar unha das súas irmás. Sentiu pena por non asistir á voda. Entón o lagarto entregoulle o seu anel, que a transportaría até a casa paterna para acompañar a súa irmá no día do casamento. Mais advertiulle que ao día seguinte da voda, sen falta, volvese para a casa. Pasado un tempo de novo chega o paxariño para avisala do casamento da outra irmá e todo sucede da mesma forma. A terceira visita do paxariño foi para comunicarlle que morrera o pai. O lagarto actuou coma as veces anteriores e insistiu: ?Podes ir, mas volta logo. Bem sabes que não voltando me redobras o encanto? (OLIVEIRA 655). Esta vez a rapariga atrasouse no regreso e cando volveu non encontrou o lagarto. Aflixida, buscouno chorando. O lagarto estaba enfermo. Díxolle que lle dobrara o encanto e que agora para volver velo debía pasar grandes traballos. Andou polo mundo até entrar de criada no palacio dun rei, onde deu a luz un meniño idéntico ao príncipe. O príncipe quixo ver o neno e recoñeceu na criada a súa esposa, pois el era o lagarto, que recobrara por fin a súa natureza humana. Nesta versión dísenos de novo que a esposa nova vive na casa dos seus sogros como unha criada. E dísenos tamén como debe ser a súa relación coa casa paterna. Debe ser equilibrada. O esposo preferiría que a súa muller cortase toda relación coa familia paterna. Sentiríase máis seguro. Pero recoñece que a esposa necesita manter contacto coa súa familia, sobre todo nos momentos máis importantes, como son o casamento das irmás e a morte do pai. O perigo está en que a esposa ?que é unha simple criada na casa dos sogros? sinta demasiada nostalxia da casa paterna. Se iso sucede, a relación co esposo pode deteriorarse. Logo, para solucionar o distanciamento, terá que esforzarse, terá que sufrir. Na recuperación do marido xogará un papel decisivo ?como xa vimos antes? o fillo que teñen en común. En xeral os contos ensinan aos esposos a manter unhas equilibradas relacións cos parentes de sangue. E mostran os perigos tanto de rompelas definitivamente como de seguir demasiado apegados a elas. A solución ideal que propoñen é o equilibrio de forzas entre as relacións consanguíneas e as relacións por alianza.
Nº 365 214