Estudos e investigacións sobre Xaquín Lorenzo Fernández
BOLETÍN DA REAL ACADEMIA GALEGA
Á esposa de «O conde Infante Lagarto» cáenlle unhas pingueiras de cera mentres contempla o seu compañeiro de cama, que esperta lamentándose: ?Dobróuseme o encanto, e agora, infeliz, só volverás a verme despois de que gastes un par de zapatos de ferro, un bastón tamén de ferro, unha saia de malla de cobre e un sombreiro de bronce? (OLIVEIRA 661). Despois de provocar o distanciamento por pretender desencantar o seu marido antes de tempo, a esposa de «O príncipe das PalmasVerdes» vese obrigada a ir pedindo esmola polo mundo adiante, pola casa do Sol, da Lúa e do Vento (OLIVEIRA 677). Tamén comete o mesmo fallo a protagonista de «O cadeado», que ha de mendigar polo mundo até que, despois de mil padecementos, atopa o seu amante (BASILE 211). Pola casa do vento do Leste, do vento do Oeste, do vento de Sur e do vento do Norte ha de camiñar en busca de seu home, tras fallar en desencantalo, a protagonista de «Ao leste do sol e ao oeste da lúa» (DIEDERICHS xaneiro 6972). No «Rei Crin» emprégase unha bela fórmula para a expiación: ?¡Rompiches o encantamento e non volverás a verme! ?berrou el ¡A menos que poidas encher sete frascos de bágoas e gastar sete pares de zapatos de ferro, sete mantos de ferro e sete sombreiros de ferro!? (CALVINO 121).
RECUPERAR CON FUSO, SARILLO, DEVANDOIRA A esposa abandonada atopa no seu longo camiño en busca do marido unha velliña, que é a axudante máxica dos contos e que representa o saber tradicional. A velliña explícalle como recuperar o home: ?Colle esta mazá, esta pera e esta laranxa e vai porte nas escaleiras do pazo do rei. E primeiro abres a mazá e sairache unha roca e un fuso de ouro e brillantes e ti has fiar coiles hastra que pase a noiva do teu marido, e cando che diga se vendes o fuso e a roca, ti dislle que non e que soio llos das se che deixa dormir unha noite co seu mozo?. Na versión castelá, como sucede a miúdo, a velliña conselleira é a Virxe. Neste caso dóalle tres noces, das que sairán unha roca, un fuso e un nobelo de fío (CAMARENA 2434). Con frecuencia o responsable do distanciamento ou o amante abandonado recuperan a súa parella revalidando as probas de selección matrimonial. Mentres que a un pretendente masculino impóñenselle probas de traballos agrícolas ?como expliquei no artigo sobre Brancaflor? e outras semellantes, ás mulleres correspóndenlles tarefas asignadas ao seu xénero: cociñar, lavar, coser e, sobre todo, fiar. En fiar grandes cantidades de la consiste a proba matrimonial para a protagonista de «As tres fiandeiras» dos irmáns Grimm e repítese noutros moitos contos. É que fiar, que ocupaba boa parte do tempo da muller casada, era o traballo feminino por excelencia. De feito na imaxe convencional da muller case nunca faltan ?xa desde os romanos? a roca e o fuso.
209 Nº 365