BOLETÍN DA REAL ACADEMIA GALEGA
Estudos e investigacións sobre María Mariño
canto ó baleiramento, ten que ver, obviamente, co segundo procedemento establecido para a concepción transcendente da palabra en María Mariño, ademais da xa tratada palabra radical ou esencial, relacionada coa noción do entender non entendendo. Referímonos, neste caso, ó paradoxo do dicir mediante o silencio ou o non dicir, que alude á insuficiencia da linguaxe para a expresión dos contidos revelados. O pensamento do baleiro atópase, como é ben sabido, no eixo central da experien? cia mística, tanto oriental ?o sunyata sánscrito ou o ku zen? como occidental ?a nada de Eckhart ou Molinos?. Supón, no seu aspecto gnoseolóxico, unha vía intermedia entre a afirmación positiva do ser e do coñecemento, característica do pensamento lóxico, e a negación solipsista da posibilidade de dito coñecemento, nunha liña nihilista, posto que se trata de confiar o coñecemento á vía negativa, ás propiedades negativas da realidade revelada que, aínda que ausentes, seguen a caracterizala. Nun sentido estritamente lingüístico, a verba quedaría reducida ó silencio que a antecede e, xa que logo, a súa característica fundamental, como indica José Ángel Valente no ensaio ?Sobre la operación de las palabras sustanciales? (1991), sería a inminencia, o feito de que se atopa a piques de dicir o que por definición non pode ser dito. Sobreenténdese, así, que a palabra poética, que o místico emprega como manifestación da súa experiencia, é involuntaria ou que non pode ser forzada a manifestarse xa que, dalgún xeito, se isto ocorrese, perdería inmediatamente a súa potencialidade significativa e quedaría reducida ás estreitas marxes que impón a linguaxe entendida como instrumento de comunicación. Do baleiramento chegamos á non intencionalidade, logo, posto que, como Maimónides propoñía para o coñecemento intelectual da divindade, asegurando que dito coñecemento deriva en incapacidade se os actos do mesmo proceden da vontade, momento no que a ciencia dexenera en ignorancia15. Outro principio habitualmente aducido a propósito do baleiramento da individualidade do místicopoeta e da ausencia de vontade nos seus actos é o da capacidade negativa que formulara no século XIX o poeta romántico inglés John Keats. Segundo este creador, a capacidade negativa maniféstase esencialmente nos poetas como a virtude de existir nun coñecemento inseguro, nas dúbidas, incertezas e misterios, sen que sexa precisa unha explicación lóxica de ditos dilemas16. A linguaxe poética, que é a linguaxe da beleza antes que das ideas conformadas sistematicamente, permite aceptar, como propón Keats, que a beleza anula calquera outro tipo de principio cognoscitivo. Estamos diante dunha escritura que representa un pensamento oblicuo ou indirecto, cun fundamento mítico e non racional, e que se apoia en caracterizacións e construcións analóxicas e simbólicas. Tal é a impresión que causa a experiencia lingüística de María Mariño, que xustifica o apelativo de ?dinamiteira da fala? pola súa busca das verbas substanciais que poden soster a súa experiencia do transcendente. A súa aproximación a dita experiencia é fundamentalmente perifrástica ou circunlocutiva17, é dicir, indirecta: non se achega a ela pola vía máis próxima ou polo camiño máis curto, senón, inequivocaNº 368 32