Alocucións académicas sobre Manuel Lugrís Freire no Día das Letras Galegas
BOLETÍN DA REAL ACADEMIA GALEGA
ciencia colectiva de Galicia como pobo. Desde os anos 1855 estivo presente, individual e societariamente, a idea de lembrar os Mártires de Carral, ou dito con outras palabras, destacar a significación da chamada Revolución de Galicia de 1846 como un fito iniciático das reivindicacións históricas do país. Moitos dos interlocutores epistolares de Murguía, de orientación liberal, non deixan de referirse a este acontecemento histórico, que aínda lembran como testemuñas oculares nas rúas de Santiago, como podemos ver nas páxinas de La Oliva (núm. 25, 26 de abril de 1856). Lugrís, como secretario da Liga Gallega, foi o máximo promotor do monumento que se inaugurou en Carral o 22 de maio de 1904. Pero xa no ano 1898 empezara a subscrición popular que culminou coa colocación da primeira pedra o 23 de abril de 1899, acto que contou coa presenza de Manuel Murguía. Foi o comezo dun complexo e difícil camiño que pasou por un concurso de ideas, supervisado por técnicos da Escola de Belas Artes. Despois de rexeitar o proxecto, entre outros, do santiagués Landeira, recae a responsabilidade da erección do monumento en Baltasar Escudero Carballás, natural de Queireza (Cerdedo, Pontevedra), cun taller de marmorería en propiedade, na rúa do Orzán, 74. O currículo que presenta Escudero dá conta de varios premios secundarios en exposicións rexionais. O prezo final do proxecto foi de cinco mil pesetas, doadas xa entre os numerosos subscritores. A partir desta data empeza un capítulo importante da historia conmemorada de Galicia e cada ano, renóvanse os anceios de liberdade para o noso país, no monumento erixido pola Liga Gallega na Cruña. Lugrís foi un adiantado na valoración da historiografía como eixo do posterior nacionalismo galego convertendo a memoria colectiva en historia. Poderíamos falar da historización da memoria seguindo a terminoloxía de Halbwachs. En definitiva, a historia aprendémola a través da lembranza de datas, de feitos e de festas importantes; trátase, ao cabo, dun relato aprendido no marco de referencia que é a nación. Lugrís fundou, co monumento aos Mártires, o gran segundo lugar da memoria da nosa cultura despois do Panteón de Galegos Ilustres en San Domingos de Bonaval. Ben entendido que lugares da memoria non é unicamente un concepto topográfico senón que é extensible a todo tipo de marcas externas que nos poidan identificar: a bandeira, o escudo, o himno etc. Non é casual que o monumento sexa contemporáneo de todos estes outros lugares da memoria que nos acaban de chegar de Cuba; pero este ten conformación pétrea, heráldica. E por este motivo Lugrís sempre peregrinou a Carral cada ano e coa mesma bandeira galega aínda que esta acubillara distintos proxectos políticos. Os distintos textos que Lugrís nos deixou arredor dos Mártires non fan máis que confirmar a vontade fundacional do autor, que empeza sendo xustificativa nos comezos do proxecto neste texto de 1898:
125 Nº 367