Alocucións académicas sobre Manuel Lugrís Freire no Día das Letras Galegas
BOLETÍN DA REAL ACADEMIA GALEGA
asinantes do manifesto de apoio a Murguía no ano 1889 con ocasión da resposta do patriarca a Sánchez Moguel. O noso escritor ten 25 anos e a súa sinatura figura entre as de Waldo Álvarez Insua, Armada Teixeiro, Fontenla Leal e os directivos do Centro Galego na Habana, Fidel Villasuso e Juan Manuel Espada. O ton retórico deste escrito de adhesión non nos impide comprobar as moitas ideas que bolen no mesmo, de clara filiación rexionalista: loita contra o centralismo, defensa da diversidade cultural de España, denuncia da masiva emigración etc., e que ten parágrafos tan expresivos coma este:
Séanos ahora permitido, estimado Maestro, a nosotros, los desterrados, testigos de mayor excepción en el litigio que se ventila, a nosotros, a quienes aleja de la tierra amada la inmensidad del Océano, tender por encima de las olas nuestras manos, estrechar las de U. con verdadera efusión y decirle: ?como U. siente, así sentimos nosotros; como U. piensa, así pensamos; su voz no es la de un hombre, es a la voz de una región que se encarna, que toma cuerpo en un individuo, porque así es preciso que suceda, pero que refleja las ideas, los sentimientos, las aspiraciones de cuantos hemos nacido en ese bendito suelo?.
A militancia galeguista de Lugrís empeza coa súa afirmación de pertenza a un lugar, a un pobo e a un legado común que se defenden con paixón, como ocorre no seu poema ?Eu son galego?1 do poemario Soidades, publicado na Habana e prologado por Curros Enríquez. Proclama o poema o orgullo de pertencer, seguindo o tópico literario, a un pobo ilustre tanto polas plumas como polas espadas e rememora todas as glorias pasadas cunha orde selectiva tal que podemos comprobar o seu profundo coñecemento da nosa historiografía, especialmente a obra de Murguía, Vesteiro Torres, Vicetto etc. Nesta evocada procesión de heroes e mártires non faltan Pardo de Cela, María Pita, os ilustrados Feixoo, Sarmiento e Cornide ao pé de Vesteiro Torres, Macías, Villamil, Méndez Núñez, os Nodales etc. Cada enumeración remata co retrouso ¡Señores, eu son galego! como mostra do orgullo patrio. Esta especie de heraldismo histórico e orgulloso repítese noutros poemas coma ?Sampaio? ou ?Ô castelo de Pambre?, do mesmo poemario, nos que se amosa un ton épico ao que non é allea a presenza de Camões entre as súas lecturas. Como constantes son as presenzas de Rosalía no poemario, especialmente os poemas ?Despedida do emigrante? e ?Volta do emigrante? onde o tópico da dozura do fogar se centra noutro dos lugares de Lugrís: Sada e os seus contornos. Esta paisaxe mariñá, evocada con nostalxia unha e outra vez, é locus amoenus, mirabilia e paradiso sucesivamente. Non é casual xa que logo que nos cheguen de América os principais símbolos da nosa identidade: himno, bandeira, escudo. E chégannos da man dos ausentes, ata o punto de que podemos dicir que, en gran parte, nos conformamos como pobo, en parte, desde a estranxeiría e non dende a familiaridade dos horizontes coñecidos. Isto explica a especial significación da palabra Terra, que se enche de connotacións e de nostalxia desde o mundo da emigración, servindo de cabeceira a moitas publicacións periódicas.
123 Nº 367