BOLETÍN DA REAL ACADEMIA GALEGA
Estudos e investigacións sobre María Mariño
unha viaxe da alma que recupera a súa vinculación coa totalidade á que pertence e que dá lugar ó paradoxo de que dita totalidade non existe de non ser pola participación particular do individuo, é dicir, que pertencendo esta ó todo e sendo ela indivisible e única, negar unha parte da mesma equivale a negar a totalidade27. No caso da autora de Noia, son moitas as referencias que se apoian na natureza ou nun sentir de carácter máis ontolóxico ou espiritual, pero que, por igual, representan a súa conciencia esencial da unidade. Algún exemplo neste sentido pode ser o ?Teño algo mui baixiño, teño algo de enxordar. / Sinto todo esto xunto, sin podelo separar? (111), ou tamén a idea da percepción absoluta, como se dun aleph borgiano se tratase, en ?Dindelas vexo todo, todo o meu bon ollar. / Aquí sinto o que non teño aló no fondo do meu chan? (115). Con particular intensidade, dita unión ou aspiración funtiva aparece en Verba que comenza, en exemplos como ?Veinme as cousas hoxe nunha? (152); ?Ouh Natureza pequeniña e longa, hoxe / téñote na man (?) / puño xusto da miña forza, / soio latido? (154); tamén, vencellando os principios do incomprensible e da unión, atopamos o seguinte exemplo: ?Calo. / Mañán direi: Todo nun. / Hoxe non entendo nada? (170). No poema 23 do mesmo libro a manifestación epifánica do misterio dáse mediante a aparición da néboa, que ten o efecto físico de unificar o disperso: ?Esta néboa en rastro envolve en voltas de paz / tódalas cousas nela i agarda? (190). Non obstante, é o poema 25 o que con máis claridade e intensidade fai referencia á unidade experimentada, neste caso, sobre a propia continxencia individual, cando a poeta, nun xogo coas operacións alxébricas básicas, se recoñece única coa totalidade, múltiple dentro da unidade e anulada no absoluto, os tres procesos nun: ?Son a suma total / daquel que foi medindo / a pegada aquela que non digo, / (?) / Son resta da esperanza ?diferencia quedou?. / Multiplicada xa nacín, / ¿para que dividirme agora?? (194). A multiplicación da identidade individual, a busca de equivalencias coa totalidade é, como acabamos de ver, outra das operacións máis frecuentes na autora como indicación da comuñón coa diversidade. O caso máis significativo probablemente sexa o que se atopa en Palabra no tempo, onde a afirmación individual supón, ó mesmo tempo, unha multiplicación: ?Son a chuvia, son a neve, son o vento da xeada. / Son a alba daquel vivir, / hoxe noite daquel sentir? (108). Moi semellante é o expresado no poema 12 de Verba que comenza, no que a voz poética se ve de repente transmutada en gota de auga que subitamente comenza a rotar en diferentes metamorfoses naturais: ?Eu non sei quen manda hoxe que fixo de min / pingoada. / (...) / Era a Lúa soia, / era o Sol que voces daba, / era néboa envolta, / era auga que corría, / era vento, / era a Terra toda? (167). Tamén podemos propor outro caso diferente, procedente de Verba que comenza, no que, cunha estética visionaria, apocalíptica e expresionista se presenta un mundo de seres híbridos, partícipes de varias naturezas ó mesmo tempo: ?Aquel hometres cabezas cruza i / atopa. / (?) / Atopa tódalas cousas. / Tres cabezas vólvense ás augas. / (?) / Eramos xa trocados ?enanos? peladiños vellos? (155).
Nº 368 36