MANUEL MURGUÍA
225
e, polo tanto, por unha pretendida contemporaneidade, aparecerán frecuentemente os castros, ós cales tamén se dedicarán numerosas páxinas. Detrás do feito de que a atención se focalice sobre estes monumentos podemos percibir dúas motivacións fundamentais: o celtismo imperante, e a propia situación da arqueoloxía galega. En primeiro lugar, o carácter ?céltico? destes megálitos. É sabido que a reconstrucción histórica de Murguía persegue o obxectivo de demostrala existencia dunha nación galega, e que a especificidade nacional tratará de apoiarse, entre outros elementos, sobre a raza celta e o pasado. Neste sentido, interesaba sobre todo dar a coñecer uns monumentos que aparecen precisamente nas nacións irmandadas con Galicia polo pasado celta: Norte de Portugal, Bretaña, Gales, Escocia e, sobre todo Irlanda, dada a reorientación irlandesa que dará Murguía ó mito celta (Barreiro 1986: 28). De feito, na primeira edición da súa Historia de Galicia (1865), Murguía non fala aínda de ? m o n u m e n t o s m e g alíticos?, senón que os denomina ?monumentos célticos?, e nesta liña é un continuador da teorización que comezara Verea y Aguiar (1838) e que manterán os historiadores decimonónicos galegos (Cfr. MartinónTorres n.p.). En segundo lugar, o outro factor derivado do contexto e que determina a preeminencia dos estudios nestes restos monumentais é que, na Galicia dese tempo, non se practican escavacións arqueolóxicas. Se os vestixios do pasado permanecen soterrados, unicamente se pode tentar extraer información daqueles restos que son, cando menos, visibles. Mentres non proliferen as intervencións sistemáticas, ?esperando ese día, y en tanto no se conoce mejor el misterio de nuestros orígenes, limitémonos a estudiar los monumentos? (1888: 23). E eses monumentos máis ou menos visibles son os megálitos e os castros. A inexistencia de escavacións será comentada máis adiante, pois nela atopará Murguía un importante atranco para o desenvolvemento das súas pretensións. Movido, deste xeito, pola súa ideoloxía e polo precario estado da disciplina arqueolóxica, introdúcese Murguía no estudio dos restos megalíticos. A continuación sintetizarémola tipoloxía destes monumentos célticos establecida por el, para proceder despois a outros comentarios que consideramos de interese: