BOLETÍN DA REAL ACADEMIA GALEGA
Estudos e investigacións sobre Xaquín Lorenzo Fernández
vencello dos seus integrantes, como da súa intensa relación co medio, á vez que da protección del. Vicente Risco, nas atraentes páxinas da obra Terra de Melide, escribiu que ?asegún a visión luminosa e xenial de Oswald Spengler, o máis vital e persistente destes símbolos (as creacións enxebres) é a casavivenda, suma expresión da raza. A casavivenda é o instrumento de acomodación do home na terra, é a ligame, o vencello do home coa paisaxe; a vida toda do home consistente esencialmente nunha relación co medio, exprésase na casa, da cal pódese deducir toda a demais cultura? (RISCO, 1936: 326). Xaquín Lorenzo abonda na mesma visión do seu mestre Risco, pois cando se dispón a estudar a casa refírese a ela como que ?O elemento máis intresante de toda a producción popular é, sen dúbida, a casa. Non enche somentes o papel de refuxio contra os ataques do meio ambente senón que é tamén o aglutinante que xungue entre sí ós membros dunha mesma familia? (LORENZO, 1962: 52). Por iso a casa é, ademais dunha construción na que se acubillan as persoas e os animais, unha institución creada para servir a un complexo grupo de fins. Porque nela se acollen aspectos distintos e interrelacionados como o físico, o cultural, o simbólico e o económico ou produtivo. Fisicamente, a casa exprésase con formas arquitectónicas moi prácticas e económicas, asentase no lugar máis axeitado, case sempre de accidentado relevo e combate a climatoloxía extrema mediante o uso de recursos materiais habituais, como son a pedra, a madeira e o barro. Verbo disto dicía o noso etnógrafo que ?O home lígase directamente á casa do mesmo xeito que a casa se xungue á terra, sendo así a vivenda o vencello que xungue ó home coa xeografía dun xeito íntimo?, e que esta unión ?faise polos dous elementos que a casa ten en sí: o posto pola man do home e o proporcionado pola xeografía? (LORENZO, 1962: 52). Formalmente, a casa interprétaa, aínda que sen explicitalo de forma clara, como o conxunto físico integrado polo edificio onde vive a familia ?a casavivenda? e mailas construccións adxectivas que estean ou non en relación coa produción: hórreo, alpendre (combarrizo), eira, muíño, alvariza, pozo (puzo), fonte... Economicamente, é o centro de explotación familiar, con funcións exclusivamente agrarias e, en casos, tamén pesqueiras ou só pesqueiras, e desde o punto de vista cultural, a casa é unha totalidade, e de feito cada unha ten un nome e unha personalidade moral. Réxese por un esquema de organización familiar baseado na convivencia baixo o mesmo teito de todos os membros da familia sometidos á autoridade do petrucio, o xefe da familia. Leva cabo de si unha carga cultural e simbólica que pon de manifesto que a construción material é algo máis que puramente instrumental, como sinala Lisón Tolosana sobre os rituais de carácter preventivo que se realizan en diversas fases do proceso construtivo da casavivenda: no comezo, ao depositar unha moeda debaixo da primeira pedra, mesturar nos cimentos unhas pingas de sangue dun animal doméstico sacrificado, ou celebrar o carrexo de materiais mediante o carreto veciñal e, cando o seu remate, celebrar ese feito con bailes e regueifas, logo de poñer o ramo no curuto do edificio.
Nº 365 22