A ANTROPOLOXÍA NA OBRA DE MANUEL MURGUÍA
por FERNANDO PEREIRA GONZÁLEZ
I. INTRODUCCIÓN A ampla e variada obra de Manuel Murguía ?que abrangue en maior ou menor medida historia, arte, literatura, etnografía, política e xornalismo? ofrece ó investigador actual a posibilidade de achegarse e profundar en diversos aspectos do pensamento e dos saberes decimonónicos, neste caso manifestados en e para Galicia. Sen embargo, a pesar desa amplitude e da recoñecida importancia da súa producción intelectual durante e despois da vida do autor, resulta un tanto paradoxal que aquela aínda non fose estudiada na súa totalidade e con detalle. Á parte dalgúns traballos importantes e pioneiros que teñen tratado distintos aspectos da súa vida e obra (Mato, 1981; Beramendi, 1982 e 1998; Máiz, 1984) aínda hoxe se están a investigar facetas dos mesmos que eran descoñecidas ou foran esquecidas ata agora. O presente traballo pretende ser unha achega máis a ese esforzo por coñecer en profundidade a súa obra e o seu pensamento. Está centrado nun aspecto que non adoita ser tratado con frecuencia, sobordado quizais polo peso dos seus escritos de carácter histórico e político, pero que sen embargo presenta unha indiscutible importancia nalgunhas das súas formulacións á hora de achegármonos ó resto da obra deste escritor coruñés. Refírome ó seu pensamento e ó seu labor antropolóxicos. Convén, con todo, que antes de continuar aclare a que me estou a referir con isto, pois na miña opinión deben ter un significado algo máis amplo do que se vén recoñecendo habitualmente. Aínda que dentro deles inclúo, evidentemente, os esforzos de Murguía á hora de recoller, estudiar e popularizala ?cultura popular? galega (o folklore , como se denominaba por entón), non é ese o único aspecto das súas ideas e do seu labor antropolóxicos que cómpre ter en conta, nin o único que a min aquí me interesa. Polo demais este aspecto concreto xa ten sido tratado ?con maior ou menor detalle e extensión? noutras