BOLETÍN DA REAL ACADEMIA GALEGA
Estudos e investigacións sobre Xaquín Lorenzo Fernández
veitamento. No primeiro recóllense aspectos que teñen que ver coas construcións do territorio, como as vedacións, que sinalan os lindeiros dunha propiedade e impiden o acceso a ela, e as regas para uso comunal da auga que vivifica as terras de labor; nun segundo refírese ás construcións de transformación dos produtos do campo, como a eira para facer a malla, o lagar para custodiar o viño en determinadas condicións, os muíños de aceite para a moenda de olivas, e os sequeiros e ouriceiras para almacenar as castañas. No quinto, dedicado aos produtos de río, estuda as pesqueiras ou pescos existentes no curso medio do río Miño; no sexto, que trata da conservación da pesca, analiza os secadeiros de peixe ao aire libre (as estacadas), e os edificios de salazón (almacéns de salgazón) para a conservación da pesca do mar; e nun sétimo e oitavo, relativos á caza e á minería, fala dos foxos para a caza do lobo no primeiro e das ferrerías no segundo. No capítulo III, Os oficios, onde rexistra máis de sesenta, estuda as construcións das pequenas factorías artesanais: os carpinteiros de ribeira, pequenos asteleiros onde se fan e reparan os barcos; os talleres oleiros e telleiras, cos seus fornos para a produción de cacharros para uso doméstico e tellas para a cubrición dos edificios; forxas e mazos para o tratamento do ferro; talleres de curtidos ou pelamios para os traballos dos coiros do gando; o muíño de casca; o folón ou batán para dar remate ás mantas; e, por último, os cubertos de feira, lugares onde se comercializaban produtos do campo e moitas das manufacturas procedentes dos obradoiros artesáns. No capítulo IV, dedicado a O traxe e A mantenza, no lugar que trata do pan considera a construción de transformación máis espallada por toda Galicia, como é o muíño de río, que é obxecto de demorado estudo, e tamén se refire ao muíño de vento. Xa por último, no capítulo V, titulado O camiño, recolle as construcións que se usan para artellar e comunicar entre si os lugares habitados ou os que se dedican a terras de labor ou de monte, como as diversas castes de camiños e os pasos de correntes de auga: pasales, poldras, pontillóns e pontes, así como vaos e portos. A CASA NA OBRA DE XAQUÍN LORENZO Na obra etnográfica de Xaquín Lorenzo, a casa será unha constante preocupación súa e por iso o protagonismo dela estará sempre presente nos seus labores investigadores. O comezo desa atención ten xa lugar nas primeiras publicacións que asina, ben en colaboración con Cuevillas (Vila de Calvos de Randín, 1930), ou con el e con Vicente Fernández Hermida (Galicia. Parroquia de Velle, 1936), ou ben sendo o único asinante (Notas etnográficas da parroquia de Borneiro, 1936), nas que o tratamento realizado por el da vivenda e doutras construcións formará parte salientable desas monografías. Porén, o traballo precursor para afondar no coñecemento da casa está incluído no volume XV da revista alemá Volkstum und Kultur der Romanen, publicado no ano 1943, en plena guerra mundial, co título ?Das Bauernhaus im unteren Limiabecken? ?hoxe en versión galega, A casa rural na Limia Baixa. (Prov. Ourense, España), no libro que co gallo do Día das
Nº 365 20