MANUEL MURGUÍA
239
r e f e rencia á estratigrafía? (Pereira 1998: 50). Este tipo de consideracións, cremos, non teñen demasiado en conta que dificilmente se pode interpretar un rexistro arqueolóxico cando se carece del; malamente se pode reconstruílo pasado a partir duns cantos restos descontextualizados; é imposible servirse da estratigrafía cando non se ten escavado. Ó longo deste traballo foron sintetizadas varias disertacións de Murguía, unhas máis atinadas, outras menos, pero todas elas obtidas a partir dos restos arqueolóxicos, espremendo os poucos datos ós que tivo acceso. Está fóra de toda dúbida que, de practicar algunha escavación arqueolóxica, os materiais serían máis abundantes e a información máis exhaustiva, pero non consideramos hipócrita a súa vontade manifesta de facer un traballo monográfico sobre antigüidades (1865: 482) e, xa que logo, a súa teima por coñecelo pasado arqueoloxicamente. Por iso, porque Murguía, a pesar dos atrancos, foi capaz de formular preguntas ós restos arqueolóxicos, témolo por digno merecedor da denominación de arqueólogo. ¿E que tipo de arqueólogo foi Manuel Murguía? Se tomamos como referencia o concepto de arqueoloxía que se tiña na España do século XIX, é dicir, o dunha actividade que se confunde coa historia da arte entre as épocas clásica e moderna (DíazAndreu e Mora 1995: 29), logo nos decataremos de que esta categoría lle queda estreita. Quizais por iso Murguía nunca se chama arqueólogo a si mesmo. Tomemos, polo tanto, un marco de referencia máis amplo pero tamén máis específico e avanzado: o do paradigma da arqueoloxía europea forxado no século XIX e que chega ata os anos sesenta deste século, paradigma ó que se lle chamou da ?arqueoloxía tradicional? (Pellicer 1995) ou ?históricocultural? (Trigger 1992: 144ss.). Neste grupo, a partir do que tratamos de sintetizar nestas páxinas, parece que Murguía encaixa mellor. O seu renovado concepto da cultura material, o seu interese pola descrición e a clasificación tipolóxica, o recurso ó folclore e á teoría difusionista, permítennos chegar a tal conclusión. E isto, ademais, sérvenos para apreciármola gran ruptura que supón Murguía con respecto ós investigadores galegos anteriores, e para facérmonos unha idea do estímulo que puido exercer sobre os que o sucederon.