BOLETÍN DA REAL ACADEMIA GALEGA
Vida oficial da RAG
3. Procedeuse á nova redacción formal de moitas acepcións para facelas máis precisas e cun estilo máis natural, tendo en conta a dispoñibilidade de léxico novo. Neste dicionario séguese o criterio da autosuficiencia, de tal xeito que todas as voces que aparecen utilizadas no dicionario deben aparecer tamén como entradas do propio dicionario. Ao incrementar o número de entradas, aumentou tamén na mesma proporción o número de palabras de que dispón o redactor para definir as acepcións. 4. De acordo coa nova distribución das acepcións, do incremento considerable do número de acepcións, e do aumento notable de voces novas, foi necesario actualizar en cada unha das entradas a indicación de sinónimos, antónimos e formas próximas semanticamente. 5. Neste momento está concluído o proceso de redacción do dicionario, queda unicamente por actualizar un número non demasiado amplo de sinónimos, antónimos e voces próximas semanticamente. Ao mesmo tempo estase revisando todo o texto redactado. Unha vez rematada esta revisión, extraeranse as voces con acepcións especializadas, que serán enviadas a distintos grupos de especialistas para que as vexan e corrixan o seu contido, caso de ser necesario. E unha vez recibidas as suxestións dos especialistas, procederase a unha nova lectura do texto, previa ao seu envío á imprenta. ? Seminario de Sociolingüística creado en 1990. Director: D. Manuel González González. Financiamento: Consellería de Educación e Ordenación Universitaria da Xunta de Galicia. Traballos desenvoltos: 1. Análise dos datos do Mapa Sociolingüístico de Galicia 2004 (MSG04) Realizáronse análises estatísticas univariantes, bivariantes e multivariantes sobre as variables referidas á lingua inicial, ás competencias lingüísticas e aos ámbitos de adquisición do galego e do castelán. Elaboráronse gráficas e táboas de resultados e comentarios dos mesmos. Tamén se compararon os resultados obtidos no MSG04 cos do MSG92, co obxecto de analizar a evolución destas variables sociolingüísticas nestes últimos 12 anos. 2. Preparación e redacción do primeiro volume do MSG04: Lingua inicial, competencias lingüísticas e ámbitos de adquisición do galego e do castelán en Galicia Despois da análise e reflexión sobre estes datos procedeuse á redacción do primeiro volume dos tres de que vai constar o MSG04: Lingua inicial, competencias lingüísticas e ámbitos de adquisición do galego e do castelán en Galicia (2006). (Está neste momento na imprenta) 3. Creación, deseño e posta en rede dunha páxina web sobre a base de datos do Mapa Sociolingüístico de Galicia do 1992 (MSG92) Deseñouse unha páxina web de consulta na que se pon á disposición de todos os internautas os datos do MSG92. Os usuarios poderán facer consultas dinámicas referidas a todos os aspectos estudados no MSG92, así como a descarga dos tres tomos publicados do citado mapa e doutros estudos significativos. 4. Elaboración de estudos, informes e cuestionarios sociolingüísticos para a Secretaria Xeral de Política Lingüística
Nº 368 294