A COMBUSTIÓN ESPONTÁNEA DE MARÍA MARIÑO. MÍSTICA E P ALABRA Manuel Fernández Rodríguez
USC
1. MÍSTICA, POSMODERNIDADE E LINGUAXE O estudo e interpretación da obra poética da escritora noiesa María Mariño Carou tense feito, segundo explica e aclara Carmen Blanco (cfr. 2007) por medio dunha serie de mitificacións e mistificacións que afectaron tanto á súa persoa como á súa obra, e que deron lugar a un coñecemento parcial de certos aspectos e a un descoñecemento total doutros. Así, unha serie de tópicos e imaxes estereotipadas foron configurando a súa personalidade literaria dende que se dera a coñecer en 1963 coa publicación de Palabra no tempo. Un dos lugares comúns que aparece case á par que a súa obra poética e que se mantén, con rigor, entre as opinións críticas ata o día de hoxe, é o da consideración da súa escritura como unha experiencia mística de corte metafísico, tal e como fora entendida por Uxío Novoneyra que, nun contexto ideolóxico existencial, a considera como a primeira poeta mística de Galicia (cfr. 1982). Carmen Blanco, que analiza a recepción crítica da obra da autora e mesmo a súa acollida no mundo literario galego, estuda os distintos enfoques que esta cuestión do misticismo irá recibindo dende Novoneyra, que é o que primeiro e máis profundamente a trata, ata, por exemplo, Méndez Ferrín, pasando por Otero Pedrayo, Manuel María, Arcadio López Casanova ou a propia Carmen Blanco, entre outros investigadores. Así, certas ideas como as da soidade esencial, a relación íntima ?ascética e sensual? coa natureza, o peso da infancia, o predominio temático do tempo e da morte, a anulación da identidade en contacto co mundo, o retorcemento e hermetismo da súa linguaxe, etc., téñense configurado como obxectos centrais da manifestación deste peculiar misticismo da escritora de Noia. O certo é que o concepto de mística ?pola ambigüidade do contido espiritual ó que fai referencia? pódese ter convertido na crítica contemporánea nunha especie de comodín ou lugar común interpretativo derivado, nalgunha medida, do desencanto da realidade que, segundo Max Weber, caracteriza a modernidade occidental e, sobre todo, da resposta posmoderna a dita situación, caracterizada por un certo retorno do sentido da sacralidade do mundo ou da conciencia da unidade de sentido da realidade. Esta sacralidade, non necesariamente relixiosa, no sentido ortodoxo e dogmático do termo, tería un carácter universal, como propón Jean François Lyotard (1994), xa que trataría de integrar os distintos aspectos da realidade.
19 Nº 368