BOLETÍN DA REAL ACADEMIA GALEGA
Estudos e investigacións sobre María Mariño
ciencia trascendiendo?. A noción abunda nunha concepción esencial da palabra poética, que poderiamos cualificar como de primixenia ou orixinal, no sentido de que sería o logos spermatico do que falaban os estoicos que tería dado lugar á multiplicidade do concreto real e na que residiría, daquela, o poder xenesíaco e a referencia directa ó Misterio. A verba carece de calquera outro atributo que non sexa ela mesma, a súa condensación fónica e semántica; é unha palabra na que conflúen o ser da palabra, o pensamento e o acto, palabra encarnada, se queremos, ou palabra obxecto, que non designa ningún referente concreto, que apreixa a nada e, entón, que se permite cohabitar co non real en tanto que non redutible a canons lóxicos. Tal verba acádase logo dun proceso de depuración da linguaxe común, que debe ser desposuída dos elementos superfluos que a foron dominando co paso do tempo e que a teñen determinado cara á designación unívoca das realidades cotiás. A linguaxe lóxica, dominada polas ideoloxías e, tamén, polo pensamento racional e causalista, que é unha linguaxe utilitaria, tería perdido a capacidade de absorción do misterio, polo que sería preciso unha rexeneración que lle devolvese as súas virtualidades e potencias máxicas e xenerativas. Tal aproximación á verba esencial implica, entón, unha reformulación do concepto de coñecemento; lonxe das causas e dos efectos, rotas as motivacións lóxicas, o coñecemento que se executa sobre a realidade é intuitivo e indirecto e é resultado da anulación dos sentidos. A súa formulación é eminentemente subtrativa, é dicir, destácanse del os seus atributos negativos, aquilo que non é ou aquilo que o distancia das formas comúns do coñecer, do ser e do dicir. Esta presenza alude a unha experiencia do misterio que é inefable, que non se pode dicir ou que, alomenos, non se pode dicir mediante o sistema de signos tradicional. É o que María Mariño experimenta e expresa de xeito peculiar pero perfectamente comprensible, sobre todo dende a segunda parte de Palabra no tempo. A linguaxe adecuada á expresión do misterio, que debe transformar en materia lingüística a experiencia da transcendencia é, sobre todo, contraditoria porque, como xa dixemos, non responde ós principios da lóxica e persegue a manifestación non do que se pode comprender, senón do incomprensible de dita experiencia. Así deberiamos entender exemplos como o xa citado ?Miro, miro e non vexo. / Sinto, sinto e non teño. / Oio lonxe e non entendo? (108). Esta presenza da palabra esencial, que é unha palabra que se abre indefinidamente cara ó sentido, en lugar de restrinxilo e acoutalo, e que se pode cualificar, daquela, como verba poética do coñecer, recibe no caso de María Mariño a reiterada designación de ?voz vella?, probablemente a máis abundante. Algúns exemplos significativos poden ser os seguintes: pode aparecer, en primeiro lugar, manifestada en certas voces naturais, como o canto do cuco ??O cuco é o que sabe... / que o seu cantar vello é? (84)?, e tamén na forma de voces tradicionais, como xa adiantamos noutro momento, unindo a memoria persoal co que podemos considerar, de feito, unha memoria universal e mítica: ?Pastoriñas que fiades (...) // Cantades versos de vello ferindo a miña lembranza? (123).
Nº 368 28