88
BOLETÍN DA REAL ACADEMIA GALEGA
problemas sociais (1882a, pp. 710). Nesta mesma liña estarán, como veremos, as súas análises dos problemas de Galicia e as súas propostas de solución. Agora ben, este innegable liberalismo ideolóxico de base sitúase nun contorno histórico concreto, a España da Restauración, perante o que pode traducirse en posicións políticas moi diferentes dentro do amplo espectro que, de esquerda a dereita, ía dende o republicanismo federal ata o conservadorismo dun Cánovas. ¿En que zona dese espectro estaba o liberalismo político do Murguía rexionalista? Bastante máis á dereita que na súa xuventude de progresista/demócrata. Como dixen, coido que este desprazamento non é alleo á experiencia do sexenio 18681874, que valora negativamente sempre nos seus escritos posteriores. Xa en 1879 confesa o seu propósito de adoptar unha actitude menos combativa e máis ?regeneradora? para a que, pensaba, os tempos eran máis ?propicios? (1879a), e eloxia a moderación ?ingénita? do pobo galego, xunto a outros pobos do Norte peninsular, así como a dos seus políticos, naqueles días ?siniestros? nos que o movemento ?suicida? do federalismo e o cantonalismo era sostido sobre todo polos pobos ?levantiscos?, de orixe semitoafricana, do Sur.5 E por se houbese algunha dúbida da mesura política do seu liberalismo, chega a declararse anos despois monárquico, malia o profesado accidentalismo do galeguismo, declaración que nese contexto implica un posicionamento político inequívoco, amén dun dos primeiros indicios da forte influencia que o rexeneracionismo español terá sobre o rexionalismo galego nos anos seguintes (1899a, I):
...para el regionalismo las formas de gobierno son accidentales [...] Ahora bien, en la actual situación de España, cuando todo nos llama a la unión y la concordia como base forzosa de nuestra regeneración, no una locura sino un crimen inconcebible sería el no aceptar desde luego las actuales instituciones y desechar su amparo y sanción para las reformas que deseamos ver implantadas. Por esto la mayoría de los regionalistas se declaran desde luego monárquicos y dinásticos. Hartos motivos de lucha y disensiones existen para buscar uno más, tan trascendental y fácil a los mayores desastres como sería un cambio radical de instituciones.
E lembremos que estas son palabras do mesmo home que, noutros niveis do seu discurso, establecía un nexo causal entre o sistema da monarquía afonsina e os para el grandes males de Galicia ?caciquismo, cunerismo, centralismo? contra os que loitará sen acougo. Precisamente por isto, a declaración precedente ten un significado aínda maior.