Guía de nomes galegos

Do latín Romulo, de orixe descoñecida; é o nome do lendario fundador de Roma.

Rómulo e Remo (século VIII a. C.) foron os míticos fundadores da cidade de Roma. Segundo a lenda, o rei de Alba Longa, Amulio, para asegurar a súa sucesión, meteu a vestal a súa sobriña Rea Silvia —filla do destronado rei Numitor—, feito que a obrigaba a un voto de virxindade. Pero Rea Silvia apareceu encinta do deus Marte e deu a luz a dous xemelgos, Rómulo e Remo, que meteu nunha cesta polas augas do Tíber (coma no caso de Moisés no Nilo). A cesta foi parar a unha xunqueira, onde unha loba recolleu as criaturas e lles deu de mamar. Cando os nenos se fixeron maiores derrocaron o usurpador. Despois os dous irmáns acabarían pelexando entre eles, e venceu Rómulo, que matou o seu irmán e se converteu no primeiro rei de Roma. O derradeiro emperador romano tamén se chamou así: Rómulo Augústulo.

Dous presidentes de Venezuela: o tamén escritor Rómulo Gallegos Freire (1884-1969), elixido en 1948 pero derrocado aos seis meses por un golpe de Estado, e Rómulo Betancurt Bello (1908-1981), que presidiu o país dúas veces: de 1945 a 1948 e de 1959 a 1964.