Guía de nomes galegos

Dun nome de orixe xermánica importado de Francia ou Cataluña, atéstase na documentación galega desde o século XII. Está composto pola raíz recc, un elemento onomástico gótico moi produtivo, de orixe escura, e mais o franco hardus ‘duro, sólido’.

Houbo varios santos ingleses con este nome: san Ricardo o Peregrino (Richard de Wessex), mítico rei saxón do século VIII que ao parecer foi coa súa familia de peregrinación a Terra Santa, pero morreu en Lucca (Italia). Outro, san Ricardo de Wych ou de Chichester (século XIII), foi chanceler da Universidade de Oxford e bispo de Chichester.

Levárono tamén tres reis ingleses: Ricardo I Corazón de León (século XII), de biografía controvertida —pois uns considerárono un rei valente e outros un soberano cruel—, é o de máis sona; participou na terceira cruzada. Ricardo II (1367-1400) e Ricardo III (1452-1485) inspiraron dramas de W. Shakespeare.

Os músicos alemáns Richard Wagner (1813-1883) e Richard Strauss (1864-1949), actores como o galés Richard Burton (1925-1984) e políticos como Richard M. Nixon (1913-1994), presidente dos EEUU de 1969 a 1974.

En Galicia destacou o filólogo, escritor e historiador da literatura Ricardo Carvalho Calero (1910-1990), a quen se lle dedicou o Día das Letras Galegas de 2020.

Ricardo Blanco Cicerón (1844-1926), avogado e arqueólogo tudense. Foi vicepresidente da sección arqueolóxica da Exposición Rexional de 1909 e membro non numerario da Real Academia Galega.