Unha xornada recupera a poesía relixiosa galega de Samuel Eiján

O convento de San Francisco de Santiago de Compostela acollerá na tarde do vindeiro mércores 12 de decembro a xornada Lembrando a Samuel Eiján. A poesía relixiosa galega. Samuel Eiján (Leiro, Ourense, 1876 – Santiago de Compostela, 1945) foi novelista, ensaísta, poeta, tradutor, historiador e profesor. O relixioso franciscano escribiu parte da súa obra en galego e converteuse axiña nun referente para a intelectualidade do momento, pero a súa creación e a súa figura ficaron esquecidas nos últimos tempos fóra do ámbito dos especialistas. O encontro da vindeira semana recordará o seu legado cun programa no marco do cal será presentado o libro que recompila a súa poesía galega, editado polo historiador Francisco Leira e polo crítico literario Armando Requeixo.

Samuel Eiján foi nomeado en 1915 membro correspondente da Real Academia Galega e en 1941 pasou a formar parte do seu pleno como numerario. A institución á que pertenceu organiza na súa memoria o encontro do 12 de decembro da man da Provincia Franciscana de Santiago, á que tamén estivo vinculado, co apoio da Xunta de Galicia mais a colaboración do Museo do Pobo Galego e o Consello da Cultura Galega.

A xornada será presentada en rolda de prensa ese mesmo día aos medios de comunicación no convento compostelán de San Francisco, ás 12:30 horas, polo presidente da RAG, Víctor F. Freixanes; o secretario xeral de Política Lingüística, Valentín García; e o ministro da Provincia Franciscana de Santiago, José Antonio Castiñeira Chouza.

O programa arrincará no convento de San Francisco ás 16:00 horas cunha primeira achega ao autor a cargo de Francisco Leira, que ofrecerá unha análise do seu tempo e pensamento. Ás 16:45 horas será a quenda de Armando Requeixo, que falará da "teopoética galega" de Samuel Eiján. A actividade retomarase ás 18:00 horas cun relatorio de José R. Rodríguez Lago que profundará na relación entre o clero católico e o galeguismo. O serán concluirá coa presentación, ás 19:00 horas, de Samuel Eiján. Poesía reunida, publicado pola Academia, a Xunta de Galicia e a Provincia Franciscana de Santiago. O presidente do padroado do Museo do Pobo Galego, Justo Beramendi, e a secretaria do Consello da Cultura Galega, Dolores Vilavedra, acompañarán os editores do libro, Francisco Leira e Armando Requeixo.

Dicionario
Axenda de actos Ver todos
Luns 18 de novembro de 2019 / 16:30 h
Toponimízate - Ordes
Venres 22 de novembro de 2019 / 19:30 h
Conmemoración do 70 aniversario da colección Benito Soto - Pontevedra
Martes 26 de novembro de 2019 / 19:00 h
A Coruña - Inauguración do Simposio Antonio Fraguas
Mércores 27 de novembro de 2019 / 16:30 h
Santiago de Compostela - Simposio Antonio Fraguas
Xoves 28 de novembro de 2019 / 16:30 h
Santiago de Compostela - Simposio Antonio Fraguas

Novas da Academia

Subscríbete