A Academia presenta un avance da análise sobre a lingua na xeración Z

O secretario da Real Academia Galega e coordinador do Seminario de Sociolingüística, Henrique Monteagudo, presentou este luns un avance do estudo sobre o galego na mocidade no marco da IV Xornada de Normalización da Deputación de Pontevedra. A análise, que conta co apoio da entidade provincial, reflicte que entre os mozos e mozas da chamada xeración Z (persoas nadas a partir de 1990) segue a haber fortes prexuízos negativos cara ao acento galego, mais tamén se detecta que a lingua galega comeza a se asociar a valoracións máis positivas, relacionadas coa dimensión competencia-status social.

Henrique Monteagudo detívose tamén na situación do idioma na provincia de Pontevedra. Segundo explicou, a comarca de Deza-Tabeirós é unha das que mellores datos ofrece de uso e transmisión xeracional, en contraste co que acontece en Vigo. Nesta cidade, "a desgaleguización xa era anterior ao estudo, polo que os rapaces e rapazas xa non teñen referentes familiares en canto ao uso do galego, e as súas referencias van proceder maioritariamente do ámbito educativo".

A xornada, presentada polo deputado de Cultura Xosé Leal, contou ademais coas achegas, igualmente centradas na mocidade, da presidenta da Coordinadora de Traballadoras e Traballadores de Normalización Lingüística, Anxos Sobriño, que falou dos proxectos YouTubeir@s e o Club de Debate; do presidente da Asociación ORAL da Galiza, Carlos Alonso, que avanzou un proxecto provincial de recuperación da regueifa nos centros escolares; e de Xiana Lastra, membro da Banda da Loba, quen expuxo a aposta deste grupo musical pola difusión de letras de autoras galegas entre a xente nova.

Dicionario

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar