As homenaxes a Carballo Calero continúan ao longo de outubro

Segundo o acordado por unanimidade na sesión plenaria do pasado 3 de xullo, a Real Academia Galega fai públicas as actividades previstas para o mes de outubro arredor da figura de Ricardo Carballo Calero, a quen este ano a institución dedica o Día da Letras Galegas. A programación arrincará o vindeiro xoves 8 de outubro coa sesión inaugural do Simposio Carballo Calero, que continuará os días 15, 22 e 29. A programación especial culminará o sábado 31 de outubro coa celebración do acto académico do Día das Letras Galegas, que terá lugar no teatro Jofre de Ferrol, cidade natal do homenaxeado, xusto un día despois do seu 120 aniversario.
Ricardo Carballo Calero intervén na celebración do Día das Letras Galegas de 1980, dedicado a Afonso X. Acompáñano na mesa, pola esquerda, Marino Dónega, Domingo García-Sabell e Francisco Vales Villamarín. Fonte: RAG


Os actos abordarán distintas facetas da obra do escritor, profesor, crítico literario e lingüista, atendendo a diferentes ópticas e posicións. Dadas as actuais circunstancias e perante a posibilidade de ter que acoutar a presenza de asistentes, a RAG emitirá en directo a través da súa canle de Youtube todas as intervencións e os debates, procurando achegarse, ademais, a todas aquelas persoas ou institucións relacionadas coa cultura galega activas no mundo: centros galegos, cátedras de lingua e literatura galegas nas universidades, institucións da lusofonía e o hispanismo, academias, asociacións culturais etc., para o cal distribuirá información en todas elas e acepta toda clase de suxestións para lograr a maior difusión posible das actividades.

Esta nova iniciativa da RAG, apoiada nas tecnoloxías da comunicación, coincide cos traballos que se veñen realizando de cara á potenciación da web da institución e os recursos dixitais da Academia. Nos últimos catro meses triplicáronse as consultas e demandas na Rede para todo tipo de cuestións: lexicografía, onomástica e toponimia, actividades culturais arredor de Carballo Calero, demanda de publicacións, consultas a arquivo e biblioteca etc.

"A RAG considera a lingua e a cultura galega unha lingua e unha cultura asentadas no século XXI, consonte a propia realidade do país. A figura de Ricardo Carballo Calero permitirá potenciar estes debates, mais inauguramos tamén un novo xeito de comunicación co mundo que faremos extensivo ás futura celebracións do Día das Letras e ás actividades da institución", salienta o presidente da Academia, Víctor F. Freixanes. "Alén das actividades presenciais, que seguiremos mantendo, entendemos que os novos tempos permiten novas formas de comunicación que debemos potenciar. As actividades arredor da figura de Ricardo Carballo Calero, malia as circunstancias adversas que estamos a vivir, inauguran unha nova xeira", engade.

Catro sesións dos estudos literarios á lingua
O Simposio Carballo Calero desenvolverase en horario de tarde no salón de actos da Real Academia Galega (rúa Tabernas, 11 – A Coruña). A sesión inaugural, moderada polo académico Ramón Villares, ofrecerá un percorrido pola vida do homenaxeado a cargo do historiador Justo Beramendi e os filólogos Carmen Blanco e José-Martinho Montero Santalha. Os estudos literarios, a obra de creación e a súa visión da lingua centrarán, respectivamente, as seguintes tres sesións, que se desenvolverán os xoves 15, 22 e 29 de outubro e que contarán con achegas de María Pilar García Negro, Dolores Vilavedra, Henrique Rabuñal, Pilar Pallarés, Rosario Álvarez, Laura Tato e Eduardo Maragoto, entre outras voces expertas.

Dicionario
Axenda de actos Ver todos
Xoves 8 de outubro de 2020 / 19:00 h
Simposio Ricardo Carballo Calero - Ricardo Carballo Calero no seu tempo
Xoves 15 de outubro de 2020 / 19:00 h
Simposio Ricardo Carballo Calero - Estudos sobre literatura
Xoves 22 de outubro de 2020 / 19:00 h
Simposio Ricardo Carballo Calero - Creación literaria
Xoves 29 de outubro de 2020 / 19:00 h
Simposio Ricardo Carballo Calero - Ideas e achegas ao idioma
Sábado 7 de novembro de 2020 / 9:45 h
V Xornada de Onomástica Galega: Os nomes comerciais - Museo de Pontevedra

Novas da Academia

Subscríbete