Académicos e académicas

Doutor en Xeografía e Historia Profesor de ensino medio. Licenciouse en Filosofía e Letras pola Universidade de Santiago de Compostela e doutorouse en Xeografía e Historia coa tese A  plástica da cultura castrexa galaico-portuguesa. 

 

É membro das seccións de Arqueoloxía e Prehistoria e de Etnografía e Folclore do Instituto de Estudos Galegos Padre Sarmiento; do padroado do Museo do Pobo Galego; da Sociedade Portuguesa de Antropoloxía e Etnografía; membro fundador da Asociación de amigos do Museo do Castro de Viladonga.

Impartiu clases de Prehistoria, Etnografía e Historia Antiga na Universidade de Santiago de Compostela.

Colaborou tamén como profesor en varios cursos de cultura galega organizados polo Instituto de Ciencias da Educación (ICE) da cidade compostelá. 

A súa actividade investigadora céntrase na antropoloxía mariñeira e na arqueoloxía castrexa.

Participou nas escavacións de castros asturianos, portugueses e galegos (Neixón. A Lanzada, Meirás, Castromao); e dirixiu durante o período 1980-84 as do castro de Baroña. No eido da etnografía, ademais dos seus propios traballos sobre a cultura mariñeira galega, colaborou nos estudos sobre as pesquerias e os muíños do río Támega no seu tramo do concello portugués de Penafiel.

Publicou, entre outros, os seguintes traballos: La cultura de un pueblo marinero: Porto do Són (Santiago, 1978); As artes de pesca en Cadernos do Museo do Pobo Galego, núm. 1, 1980, Arte, decoración , simbolismo e outros elementos da cultura material castrexa. Ensaio de síntese (Santiago, 1983), As orixes do castrexo no bronce final (Santiago, 1983), Castro de Baroña. Campañas 1980-1984; Xentes do mar: traballos, tradicións e costumes (1996)  e Galicia. Antropoloxía (1997).