Un selo conmemorativo e un gran mural para a recta final do Ano María Victoria Moreno

María Victoria Moreno será a protagonista dunha tiraxe especial de selos de correos para coleccionistas. Verá a luz o vindeiro 22 de novembro, o día do 13 cabodano da autora á que a Real Academia Galega dedicou este 2018 o Día das Letras Galegas. O Concello de Pontevedra tamén a homenaxeará na recta final do seu ano cun gran mural na rúa Eduardo Pondal que amosará a pegada que deixou na cidade onde se estableceu ao chegar a Galicia nos anos 60.
M. V. Moreno retratada pola
ilustradora Tania Solla

O Concello de Pontevedra agasallará cun selo da tiraxe especial as distintas entidades implicadas no Ano María Victoria Moreno, os centros sociais da cidade e a familia da autora. As persoas interesadas en facerse cun destes selos tamén poderán solicitalo á administración local, segundo anunciou onte o concelleiro de Normalización Lingüística.

Alberto Oubiña explicou ademais que o mural de homenaxe a María Victoria Moreno se debuxará na rúa Eduardo Pondal, xusto fronte á ponte da avenida de Vigo onde unha placa xa recorda a quen foi veciña desta rúa, o lugar de inicio durante estes meses do roteiro polos seus espazos vitais. O deseño é de Tania Solla e da súa execución, que empezará o vindeiro 14 de outubro, encargarase Polo Correo do Vento. Neste último trimestre de 2018 tamén terán lugar en Pontevedra dous obradoiros de contacontos infantís ilustrados dedicados á protagonista do último 17 de maio. Desenvolveranse no Centro Leste e na Casa da Cultura de Monte Porreiro. A distribución nos centros de ensino e sociais da biografía da autora escrita por Joanna Lorenzo e ilustrada por Tania Solla completan as accións municipais arredor do Día das Letras Galegas dedicado a María Victoria Moreno.

A Real Academia Galega celebrará, pola súa banda, os días 27 e 28 de novembro o Simposio María Victoria Moreno cun completo programa de relatorios e mesas redondas. Os encontros terán lugar na sede da institución, na rúa Tabernas da Coruña.

Dicionario
Axenda de actos Ver todos
Mércores 12 de decembro de 2018 / 16:00 h
Santiago: Lembrando a Samuel Eiján. A poesía relixiosa galega
Mércores 12 de decembro de 2018 / 18:00 h
Ponteceso - Fundación Eduardo Pondal: Charla da campaña 'Toponimízate'
Xoves 13 de decembro de 2018 / 19:30 h
Muros - Aula Cemit: Charla da campaña 'Toponimízate'
Venres 14 de decembro de 2018 / 12:00 h
Xinzo de Limia - IES Lagoa de Antela: Charla da campaña 'Toponimízate'
Mércores 19 de decembro de 2018 / 10:00 h
Ribadumia - CPI Julia Becerra Malvar: Charla de 'Toponimízate'

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar