O Simposio María Victoria Moreno presentará a finais de novembro novas olladas á autora

Sobre María Victoria Moreno e o seu legado queda aínda moito por dicir. Os vindeiros 27 e 28 de novembro quince voces profundarán na vida e obra da protagonista do Día das Letras Galegas 2018 no simposio que a Real Academia Galega lle dedica a quen é unha figura central da literatura infantil e xuvenil galega, pero non só iso. O encontro pescudará na súa produción literaria e no perfil máis humano, mais tamén na importante acción cultural que empezou a desenvolver pouco despois de chegar a Galicia como docente. O simposio, organizado polas académicas Fina Casalderrey e Marilar Aleixandre, desenvolverase en horario de tarde. A entrada é libre e a inscrición, gratuíta.

A obra literaria da autora centrará a primeira xornada do Simposio María Victoria Moreno. Tras a apertura do foro, ás 16:30 horas, a profesora da Universidade de Santiago de Compostela Blanca Ana Roig Rechou, experta en literatura infantil e xuvenil, pronunciará a conferencia inaugural, Un lugar de honra na LIX. María Victoria Moreno. Seguiralle o relatorio de Antonio García Teijeiro, Premio Nacional de LIX e amigo persoal da homenaxeada desde que a finais dos anos 80 compartitu con ela a codirección da colección de Galaxia para o público máis novo. O escritor deterase na relación entre María Victoria Moreno e a poesía para a infancia, un xénero que cultivou en títulos como Eu conto, ti cantas ou a historia en verso da cadeliña Alma de E haberá un tirón de orellas?

A primeira xornada continuará cunha mesa redonda e concluirá cun recital. Na primeira, moderada polo académico correspondente Xoán Babarro, afondarán na produción literaria de María Victoria Moreno a escritora, docente e secretaria xeral da Asociación de Escritoras e Escritores en Lingua Galega, Mercedes Queixas; Isabel Soto, tradutora e coautora, xunto a Xavier Senín, da biografía María Victoria Moreno. Sementadora de futuro; e o académico de número Andrés Torres Queiruga.

A tarde rematará cun recital conducido polo escritor Xesús Rábade Paredes, exalumno e amigo de María Victoria Moreno, que unirá a súa voz ás do académico Darío Xohán Cabana (un dos poetas escolmados en 1973 pola autora en Os novísimos da poesía galega), Ana María Fernández, Antonio García Teijeiro, Mercedes Queixas e Xoán Babarro.

A xornada do mércores 28 de novembro ofrecerá diversas olladas á biografía e á acción cultural da autora. O primeiro relatorio correrá a cargo doutro amigo persoal, biógrafo e editor da homenaxeada, Xavier Senín. O tradutor coñeceu a autora cando esta participou como profesora de profesores nos primeiros cursos de lingua e cultura galegas para o profesorado, que se empezaron a impartir nos primeiros anos 80 do século pasado, un dos perfís de María Victoria Moreno que xustifica o título da súa intervención, Xenerosidade e compromiso coa cultura galega. Naqueles cursos tamén participou, como alumna, a académica Fina Casalderrey, quen participará deseguido co relatorio titulado A mestra e a pegada do camiño ensinado.

A mesa redonda da segunda xornada será moderada pola académica Marilar Aleixandre e contará coas achegas do editor e mestre Manuel Bragado, a crítica literaria, profesora da USC e biógrafa de María Victoria Moreno Montse Pena e a profesora da UVIGO Isabel Mociño. Manuel Bragado centrarase nos ensaios da autora, Isabel Mociño ofrecerá unha ollada á conciencia cívica adiantada ao seu tempo que sempre amosou e Montse Pena Presas indagará no labor que desenvolveu como autora de libros de texto para achegar a literatura galega á mocidade.

No activismo cultural e cívico de María Victoria Moreno profundará tamén na conferencia de clausura o académico Xesús Alonso Montero, amigo persoal da homenaxeada desde que foron compañeiros de departamento nos anos 60 no daquela Instituto Masculino de Lugo.

O simposio pecharase coa proxección dunha escolma de vídeos que ilustran como se vive hoxe a obra e a figura de María Victoria Moreno nos centros escolares.

Dicionario
Axenda de actos Ver todos
Mércores 19 de decembro de 2018 / 10:00 h
Ribadumia - CPI Julia Becerra Malvar: Charla de 'Toponimízate'

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar