O Simposio Manuel María analizará a vida e obra do autor da man de máis de vinte expertos

A Real Academia Galega celebrará os vindeiros días 22, 23 e 24 un encontro que xuntará ao longo de tres tardes máis dunha vintena de persoas expertas en distintos aspectos da obra do protagonista do Día das Letras Galegas de 2016. O Simposio Manuel María continúa a celebración do ano dedicado ao poeta chairego cun programa, aberto a todo o público, no que os relatorios e mesas de debate comparten cartel co recitado dos seus versos, e que concluirá coa proxección do documental sobre o homenaxeado Eu son fala e terra desta miña terra, da académica Margarita Ledo Andión. Todas as actividades se desenvolverán na sede da RAG, na rúa Tabernas, 11 da Coruña.

Manuel María retratado por Xosé Castro


A apertura do simposio, o martes 22 ás 16 horas, contará con outro membro da RAG e tamén amigo persoal do poeta, Darío Xohán Cabana, que pronunciará a conferencia inaugural, titulada De Muiñeiro de brétemas a Advento: a progresión fulgurante, a partir das 16.30 horas. De seguido, Marta Dacosta, Manuel López Foxo e Rosalía Fernández Rial analizarán distintos aspectos da obra poética de Manuel María nunha mesa de debate moderada por Mercedes Queixas. A primeira xornada concluirá cun recital de poesía do homenaxeado nas voces de Marica Campo, Rosalía Fernández Rial, Marta Dacosta, Cesáreo Sánchez e Xulio López Valcárcel.

O programa do mércores 23 de novembro inclúe unha conferencia de Camilo Gómez Torres, Manuel María: biografía e creación; unha mesa de debate, moderada polo académico Henrique Monteagudo, na que Mercedes Queixas, Carmen Fernández-Pérez Sanjulián e Xosé Ramón Freixeiro Mato falarán da obra narrativa e xornalística de Manuel María e da importancia da lingua na vida, na creación e no pensamento do autor; e tres relatorios de Henrique Rabuñal, Montse Penas e Xurxo Souto sobre a historia inserida no teatro de Manuel María, o papel que xogou a súa escrita na educación literaria en galego e a súa relación coa música.

O xoves 24 de novembro a xornada arrincará cunha mesa de debate sobre a relación entre poesía e política en Manuel María que moderará a académica Margarita Ledo e que terá como convidados a Xosé Estévez, Pilar García Negro e Carlos Quiroga. Na quenda de relatorios, Antón Lopo levará o público ata o universo literario da libraría Xistral, que Manuel María e a súa dona Saleta Goy rexentaron en Monforte de Lemos; Xosé Lois García percorrerá as súas paisaxes identitarias e a académica Fina Casalderrey abordará a pegada que Manuel María deixou nas escolas. A partir das 19.30 proxectarase, xa para rematar, o documental Eu son fala e terra desta miña terra, un retrato de Manuel María coa súa propia voz que recupera imaxes de distintos momentos e escenarios da vida do poeta.

Dicionario

Novas da Academia

Subscríbete

Cuberta do Boletín 380

Boletín da Real Academia Galega
nº 380

 

Cursos de Verán 2020


Toda a información
nesta páxina

 

Cadernos de Lingua
nº 37

 

Normas ortográficas e morfolóxicas do idioma galego
(23ª ed.)

 

Vocabulario Ortográfico da Lingua Galega

 

Hemeroteca Virtual
Galicia nas páxinas dos seus xornais.