O Premio Rosa dos Ventos 2018 recoñece a Fina Casalderrey

A lectura dos libros de Fina Casalderrey deixou pegada nos mozos e mozas do Instituto Santiago Apóstolo de Buenos Aires. "Mergulláronnos na marabillosa cultura galega, a cal defendemos e defenderemos tendo a Fina -xunto a outros insignes intelectuais- como guieira". Así queda reflectido na resolución da última edición dos Premio Rosa dos Ventos, que concede anualmente o alumnado de quinto de bacharelato deste centro arxentino-galego. A escritora e académica é a gañadora deste ano por decisión dun xurado que, xunto á calidade da súa obra e a súa "defensa comprometida da lingua galega", quixo salientar o seu carácter.

Fina Casalderrey, no centro da imaxe, co alumnado do instituto arxentino-galego Santiago Apóstolo durante a súa visita á Academia o pasado mes de setembro. Fonte: RAG


"Fina tiña que ter a nosa Rosa dos Ventos", expresan os mozos e mozas que resolveron o galardón, que valoran tamén a condición da académica como docente. "É ante todo mestra, e iso nótase cando un a escoita. Achega os conceptos dun xeito amable, sen estridencias, con agarimo...", engaden sobre unha autora que puideron coñecer en persoa e que, "malia ser unha das figuras máis importantes da literatura infantil e xuvenil", é unha persoa de "talante modesto, respectuoso, cariñoso, cercano eoptimista".

En edicións anteriores, o Premio Rosa dos Ventos recoñeceu tamén o labor do actual presidente da RAG, Víctor F. Freixanes, os académicos de número Manuel Rivas e Henrique Monteagudo, o músico Carlos Núñez, Luís G. Tosar e o físico Jorge Mira, membro correspondente da RAG. "Xa ía sendo hora de que unha muller gañase o noso premio. Cremos na diversidade do mundo e, por iso, tamén cremos na igualdade de xénero. Non entendemos a discriminación e apostamos por intensificar o rol da muller neste século, tal e como defende Fina", conclúen os responsables da concesión do premio.

Dicionario
Axenda de actos Ver todos
Mércores 12 de decembro de 2018 / 16:00 h
Santiago: Lembrando a Samuel Eiján. A poesía relixiosa galega
Mércores 12 de decembro de 2018 / 18:00 h
Ponteceso - Fundación Eduardo Pondal: Charla da campaña 'Toponimízate'
Xoves 13 de decembro de 2018 / 19:30 h
Muros - Aula Cemit: Charla da campaña 'Toponimízate'
Venres 14 de decembro de 2018 / 12:00 h
Xinzo de Limia - IES Lagoa de Antela: Charla da campaña 'Toponimízate'
Mércores 19 de decembro de 2018 / 10:00 h
Ribadumia - CPI Julia Becerra Malvar: Charla de 'Toponimízate'

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar