O Arquivo enriquece o fondo de Emilia Pardo Bazán con 85 cartas inéditas da autora que abranguen catro décadas

A Casa-Museo Emilia Pardo Bazán acolleu esta tarde a presentación do novo número da revista La Tribuna. Cadernos de estudos da Casa-Museo Emilia Pardo Bazán, un acto que serviu de ocasión para dar a coñecer, no que foi o fogar de Emilia Pardo Bazán, un novo conxunto documental de gran valor para o estudo da autora. Confórmano un total de 85 cartas autógrafas, ata o momento inéditas, que a propia autora lle enviou entre os anos 1870 e ben entrado o século XX á súa amiga Carmen Miranda Armada, residente en Santiago de Compostela, desde A Coruña, Meirás, Mondariz, París e Madrid. Con esta correspondencia adquirida recentemente pola Real Academia Galega, o arquivo da institución enriquece o fondo que custodia da escritora e abre novos vieiros aos especialistas na súa vida e obra para seguir a investigar nela.

Pola esquerda, Javier Ozores, Cristina Patiño, Xosé Ramón Barreiro, Víctor F. Freixanes, Pilar Couto e Mar Novo. Fonte: RAG


No acto interviñeron o presidente da Real Academia Galega e director da Casa-Museo Emilia Pardo Bazán, Víctor F. Freixanes; o director da publicación, o académico Xosé Ramón Barreiro Fernández; Pilar Couto Cantero e Cristina Patiño, subdirectora e secretaria da revista; Javier Ozores, autor do libreto que adapta a novela La Tribuna á ópera; a doutora Mar Novo, que centrou a súa intervención nos contos de Emilia Pardo Bazán; e Ricardo Axeitos, técnico do Arquivo da RAG, encargado de presentar as cartas inéditas.

Ao non conservarse a correspondencia recibida por Emilia Pardo Bazán, os investigadores teñen acudido aos arquivos que se conservan dos posibles receptores das súas misivas. Entre as localizadas ata o momento, este conxunto documental, totalmente descoñecido e inédito, é sen dúbida un dos máis relevantes tanto polo volume de cartas como polo amplo período de tempo que abrangue, desde a década dos anos 70 do século XIX á década de 1910.

A correspondencia de Emilia Pardo Bazán a Carmen Miranda presentada está asinada e atópase en bo estado de conservación. Moitas cartas foron escritas en papeis con diferentes cabeceiras -da revista Nuevo Teatro Crítico que ela mesma editou e redactou entre 1891 e 1893, de hoteis, balnearios etc.- nos que a escritora deixou valiosas referencias biográficas, sen que falten alusións á súa vida intelectual.

A receptora desta correspondencia pertencía a unha familia de rendeiros e estaba casada con Jacobo Pedrosa y Ulloa, un dos principais xefes do carlismo galego. Por iso tamén se pode atopar nestas cartas algún comentario interesante sobre a militancia tradicionalista de Emilia Pardo Bazán. Teñen, ademais, a curiosidade de permitir coñecer de primeira man a relación da novelista coa moda feminina da súa época, pois moitas das cartas xiran arredor do intercambio de noticias e apreciacións sobre esta, e algunhas delas ata inclúen bosquexos de vestidos realizados pola propia Emilia Pardo Bazán.

Da ópera de ‘La Tribuna' á historia da inauguración da estatua da autora
O último número de La Tribuna: Cadernos de Estudos da Casa-Museo Emilia Pardo Bazán publica, entre outros contidos, o libreto La Tribuna, no que Javier Ozores adapta a novela homónima da escritora coruñesa da man de Gabriel Bussi, que asina a parte musical. Deste labor falou esta tarde na presentación do volume Ozores, mentres que Mar Novo se detivo noutro subxénero narrativo no que destacou Emilia Pardo Bazán, o do relato. A filóloga dedicou aos contos da autora a súa tese de doutoramento, un traballo que será recollido en forma de resumo no vindeiro número da revista.

O número 12 da publicación tamén inclúe unha achega de Manuel González Prieto sobre dous fitos na vida da autora acontecidos no ano 1916: o seu nomeamento, o 12 de maio, como "catedrático numerario de Literatura contemporánea de las Lenguas neo-latinas de la Universidad Central", e a inauguración, o 17 de outubro, da escultura que se ergueu na Coruña en homenaxe a ela. Entre outras achegas, Ruth Gutiérrez Álvarez ofrece ademais unha aproximación aos personaxes femininos das últimas novelas da autora; Santiago Díaz Lage estuda as valoracións realizadas por tres críticos franceses de La Tribuna e El cisne de Vilamorta; Ángeles Ezama Gil repasa a presenza da danza na obra da escritora; María Isabel Jiménez Morales profunda nas crónicas xornalística que asinou sobre a Exposición Universal de París de 1900 e a súa publicación posterior como libro; e Carlos de Odriozola y Rico-Avello presenta a xenealoxía da liñaxe da avoa paterna de Emilia Pardo Bazán, dona Joaquina Mosquera.

Dicionario
Axenda de actos Ver todos
Venres 16 de novembro de 2018 / 20:00 h
Charla da campaña Toponimízate en Moaña
Mércores 21 de novembro de 2018 / 16:30 h
Charla da campaña Toponimízate en Miño
Xoves 22 de novembro de 2018 / 13:00 h
Ourense: Exposición dos 150 anos da 'Gramática' de Saco Arce
Xoves 22 de novembro de 2018 / 16:30 h
Ourense: Homenaxe a Saco Arce. 150 aniversario da 'Gramática gallega'
Venres 23 de novembro de 2018 / 17:30 h
Charla da campaña Toponimízate en Parada de Sil
Martes 27 de novembro de 2018 / 13:00 h
'Toponimízate' chega a Cospeito
Martes 27 de novembro de 2018 / 16:30 h
Simposio María Victoria Moreno
Mércores 28 de novembro de 2018 / 16:30 h
Simposio María Victoria Moreno
Venres 30 de novembro de 2018 / 19:00 h
Charla da campaña Toponimízate en Cariño

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar