As academias das xeracións nativas dixitais

O presidente da Real Academia Galega, Víctor F. Freixanes, e o director da Real Academia Española, Darío Villanuena Prieto, protagonizaron o encontro organizado onte polo Ateneo de Santiago. Os dous convidados repasaron este luns as orixes e os obxectivos das respectivas academias e profundaron nos desafíos do seu presente e futuro. Ambos os académicos coincidiron en sinalar como principal reto ser de utilidade para as xeracións nativas dixitais. "A lingua galega non pode quedar á marxe das batallas das tecnoloxías dixitais", salientou o responsable da RAG.
O presidente da Real Academia Galega, Víctor F. Freixanes, e o director da Real Academia Española, Darío Villanueva, na mesa dos Luns do Ateneo, moderada por Pilar Sampedro. Fonte: RAG


A última sesión dos Luns do Ateneo, presentada por Pilar Sampedro, estivo dedicada a dúas institucións históricas que determinan as normas das linguas que representan. A primeira en nacer foi a Real Academia Española, creada en 1713, case douscentos anos antes que a Real Academia Galega, inaugurada oficialmente en 1906. Durante moito tempo, o xeito de traballaren nos dicionarios, os seus recursos máis destacados, matívose sen cambios, ata que nos anos 80 as aplicacións informáticas propiciaron unha primeira revolución, á que seguiu a que supuxo poder publicar en liña estas ferramentas lexicográficas. "Esta revolución permitiunos transmitir de xeito impensado o traballo realizado", salientou Darío Villanueva, que se referiu tamén á nova plataforma de servizos lingüísticos dixitais posta en marcha pola RAE a comezos deste ano.

Víctor F. Freixanes apuntou tamén como as novas tecnoloxías se están a aproveitar para a conservación e divulgación da toponimia, outros dos eidos aos que a Real Academia Galega presta especial atención, e afondou na liña de traballo que a institución desenvolve no campo da sociolingüística, moi centrada nestes momentos no diagnóstico do que acontece entre a xente máis nova. Malia a preocupación pola perda de uso do galego entre as persoas de menor idade, o responsable da RAG lanzou unha mensaxe en clave positiva sobre o futuro dunha lingua "viva, instalada en Internet, que produce cultura".

O presidente da RAG reivindicou ademais un mellor financiamento para a Real Academia Galega, poñendo como exemplo as achegas públicas que recibe a Real Academia da Lingua Vasca. Darío Villanueva tamén fixo alusións ás cuestións económicas ao definir as calidades que debe ter o presidente dunha academia. Alén do prestixio intelectual e a capacidade de relación institucional, hoxe é "incluso máis importante a capacidade de xestión case en termos empresariais". "Seguramente Menéndez Pidal non veu unha factura na súa vida", ironizou en referencia ao primeiro presidente da RAE nado en Galicia.

Dicionario
Axenda de actos Ver todos
Mércores 12 de decembro de 2018 / 16:00 h
Santiago: Lembrando a Samuel Eiján. A poesía relixiosa galega
Mércores 12 de decembro de 2018 / 18:00 h
Ponteceso - Fundación Eduardo Pondal: Charla da campaña 'Toponimízate'
Xoves 13 de decembro de 2018 / 19:30 h
Muros - Aula Cemit: Charla da campaña 'Toponimízate'
Venres 14 de decembro de 2018 / 12:00 h
Xinzo de Limia - IES Lagoa de Antela: Charla da campaña 'Toponimízate'
Mércores 19 de decembro de 2018 / 10:00 h
Ribadumia - CPI Julia Becerra Malvar: Charla de 'Toponimízate'

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 378

Boletín da Real Academia Galega
nº 378

Consultar

Cadernos de Lingua
nº 36

Consultar