264
BOLETÍN DA REAL ACADEMIA GALEGA
toda a historia humana. Neste punto Murguía superara xa os límites impostos pola tradición bíblica (por máis que seguía a ver no ?glorioso destino? das razas arias a man da providencia divina). Sen atacar directamente a narración bíblica, e sen adoptar unha postura polemizadora cara a ela, eliminaba da súa historia tódalas referencias bíblicas. Se nas anteriores historias de Galicia (ou na do seu contemporáneo Vicetto) o relato bíblico seguía a serlo marco de referencia fundamental a través da cronoloxía tradicional, das xenealoxías bíblicas ou da realidade do Diluvio e dunha revelación divina inicial... no primeiro tomo da súa Historia de Galicia (1865) todo isto desaparecía de golpe, sendo substituído en troques por referencias ?a dicir verdade bastante vagas? á grande antigüidade da humanidade, ós celtas e a unha escura poboación precéltica de orixe asiática, para todo o cal a información arqueolóxica debía xogar un papel fundamental. Aínda que neste momento Murguía non se fixese eco dun discurso claramente oposto ó relato tradicional ?como era o evolucionista?, si era de grande importancia que tódalas referencias bíblicas desaparecesen da súa historia, o que indicaba que xa estaba a ser influído polas distintas teorías ?nonortodoxas? que corrían daquela por Europa, especialmente as relacionadas coas investigacións prehistóricas. Por outra banda, resulta evidente que isto tiña que afectar ó seu xeito de concibila historia e á súa maneira de escribila ?ampliando a perspectiva temporal da mesma, dando máis importancia á información arqueolóxica, e mudando radicalmente o discurso sobre os primeiros poboadores do país?. Todo iso facía que a súa imaxe da primitiva historia de Galicia se diferenciase en boa medida das anteriores (aínda admitindo unha certa continuidade con elas). Pero a súa posición antropolóxica arredábase igualmente do evolucionismo unilineal decimonónico, no sentido de que o progreso que imaxinaba Murguía era basicamente d e s c o n t i n u o e limitado a unha serie de razas que tiñan a capacidade para mellorar. En troques de ser cada sociedade a responsable da súa evolución progresiva, eran as razas creadoras de civilización as que espallaban os seus logros entre o resto a través de migracións, invasións e conquistas. O papel das outras razas era pasivo, meramente de receptoras (sempre e cando fosen capaces de asimilaren unha cultura superior, claro está). Non cabe dúbida que semellante interpretación dos mecanismos do cambio cultural se axeitaba moi ben a unha época de imperialismo na cal os valedores da coloni