276
BOLETÍN DA REAL ACADEMIA GALEGA
prioridades. Algúns exemplos desta selección xa os vimos nas páxinas anteriores, pero había outros. Por exemplo, no aspecto arqueolóxico Murguía seguirá mantendo a orixe celta dos monumentos megalíticos, cando a meirande parte dos investigadores máis reputados xa abandonaran esa explicación a prol de teorías máis sofisticadas. E o mesmo cabe dicir do seu apoio á teoría sobre a poboación precéltica de orixe asiática ou finesa, teoría invalidada nas últimas décadas do século XIX, pero que aínda seguía a empregar Murguía para dar sentido á súa imaxe da prehistoria europea (que tendía a ter en conta unicamente o elemento céltico ou ario). Igualmente, os seus obxectivos e compromisos tamén se reflectían nas súas ideas raciais. Non pode ser unha casualidade a súa elección dos presupostos e das teorías de Edwards verbo da inmutabilidade das razas; pola contra, eran estes uns firmes alicerces nos que apoialas súas pretensións sobre a singularidade dos galegos. Ademais os métodos i m p resionistas de clasificación racial permitíanlle a Murguía unha rápida e satisfactoria determinación do substrato racial do país (lembremos que se cría capaz ?como o propio Edwards? de distinguir a simple vista a raza á que pertencía practicamente cada habitante de Galicia). Aínda que o dogma racial se mantivo ata ben entrada a presente centuria, refinamentos técnicos e teóricos realizados durante a segunda metade do XIX fixeran imposible mantela confianza nas clasificacións raciais impresionistas de décadas antes. Non obstante as ideas raciais de Murguía mantivéronse tan inmutables como a súa raza galega, precisamente porque lle seguían sendo útiles. Poderíase dicir, en fin, que a adopción do factor racial como un elemento decisivo á hora de configuralo seu discurso galeguista tivo importantes consecuencias non só para o seu pensamento político ou para o seu labor como historiador (como xa demostrou Ramón Máiz), senón tamén para o seu pensamento antropolóxico. Pois este peso das explicacións raciais en Murguía influíu grandemente nas súas opinións sobre a identidade galega ou sobre as posibles relacións do pobo galego con outros pobos (con outros países celtas ou cos casteláns/semitas), e determinaba tamén en boa medida a visión que tiña sobre a propia humanidade e a súa historia (rexeitando, por exemplo, algunhas das ideas básicas do evolucionismo). Ademais chegaba a modificar certos contextos nos que se insería, como por exemplo aqueles presupostos da ?tra