BOLETÍN DA REAL ACADEMIA GALEGA
Eladio Rodríguez González
por esta razón anuncia ós seus íntimos que votará a favor de Eladio Rodríguez. O cal cómpre aclaralo permanece alleo ós manexos de Correal e non ten ningunha intención de presentarse a unha nova elección presidencial. O Ministerio de Educación tarda en reaccionar, sorprendido no seu propio terreo, xa que se acusa de ilegal un proceso tutelado polas autoridades franquistas: ¿podería darse o caso de que o Caudillo estivese presidindo unha corporación ilegalmente constituída? A asesoría xurídica do Ministerio estudia o asunto e o 16 de maio de 1944 o Ministerio dispón: 1º) a Real Academia Galega depende única e exclusivamente do Ministerio de Educación Nacional; 2º) cesar a xunta de goberno elixida o 13 de decembro de 1942, deixando en suspenso todos os acordos adoptados por esta a partir do 24 de xullo de 1941; 3º) nomear delegado especial do Ministerio ó rector da Universidade de Santiago, Luis Legaz Lacambra, o cal procederá á constitución regulamentaria dunha nova xunta de goberno88. Con esta disposición ministerial, as autoridades franquistas deixan tamén en suspenso, curiosamente, o nomeamento do Caudillo como presidente de honor da Academia e o dos dezaoito numerarios que tomaran posesión conxunta en Compostela. A vida da Academia Galega paralízase novamente. O Goberno Civil da Coruña procede a unha investigación de todos os académicos nomeados antes e despois da citada data. Prohíbense as informacións á prensa e o proceso lévase en absoluto segredo. A xunta cesada expresa a súa protesta pola maneira en que se lles comunica o cesamento, sen lles dar explicacións nin lles facer cargo ningún. O 19 de xuño, a requirimento de Luis Legaz Lacambra, constitúese a xunta de idade, integrada por Eladio Rodríguez González (presidente), Ramón de Artaza Malvarez (secretario) e Manuel Banet Fontenla (tesoureiro). Nesta primeira sesión, a xunta de idade é invitada a revalidar o nomeamento do xefe do Estado como presidente de honra da Academia e o dos académicos numerarios proclamados na sesión extraordinaria do 27 de xullo de 1941. Estes acordos particípanse ós académicos con data do 30 de xuño (Epistolario, III.2). A xunta de idade convoca sesión xeral extraordinaria para o 15 de outubro de 1944, con dous únicos puntos na orde do día: 1) elección dos cargos directivos; 2) revalidación da posesión dos numerarios ultimamente nomeados (Epistolario, III.4). (En cambio, non se volverá sobre o nomeamento do Caudillo, pois debe considerarse suficientemente revalidado pola xunta de idade). O día previsto, preside o acto Luis Legaz Lacambra, coa xunta de idade, e asisten doce académicos que levan a representación doutros tantos. Correal, Baldomir e Carro non están presentes nin representados. Efectuadas as votacións, resultan elixidos por unanimidade para os cargos de presidente, secretario e tesoureiro os mesmos que foran elixidos pola Academia e cesados polo Ministerio, é dicir, Manuel Casás, Alejandro Barreiro e Ángel del Castillo. A acta da sesión é enviada a Madrid, con informe e fichas policiais dos elixidos89.
Nº 362
46