BOLETÍN DA REAL ACADEMIA GALEGA
Traballos de investigación e estudo
sonoro (casos 2, 3, 4 e 5), ou ben o dunha secuencia dadeda, con tres sílabas con /d/ na marxe prenuclear (caso 1). É evidente que nestes contextos se dan condicións óptimas para que se produzan fenómenos disimilatorios que eliminen o elo máis débil da cadea, que non é outro ca a sílaba postónica de de cada substantivo afectado: non poderían suprimirse nin a sílaba tónica do substantivo, por razóns obvias, nin a preposición ou contracción subseguintes, salvagardadas como están pola importancia das funcións sintácticas e semánticas que desempeñan. A importancia que adquire a haploloxía na xeración das variantes reducidas resplandece no exemplo número 3, onde se observa que case inmediatamente despois de Santidá ocorre o substantivo Cristiandade nun contexto en que non vai seguido da preposición de. Ao noso modo de ver, para explicar a aparición e a difusión da variación ?dade/?dá cómpre ter moi presente a entrada en xogo da haploloxía en contextos como os que acabamos de presentar, nos que se insiren con frecuencia os substantivos que conteñen os sufixos ou terminacións que analizamos nesta alínea. No plural só se utilizaron formas plenas: necesidades (2.1, 3.2), paredes (3.1). Así, pois, as manifestacións desta variable na lingua d'Ó Apóstol Santiago son equiparables ás que se detectan na xeneralidade das fontes escritas dos séculos XVIII e XIX. 5.3.5.4. Outros sufixos e terminacións Hai unha absoluta preferencia polas variantes cultas no caso dos sufixos e terminacións en que desde a Idade Media viñera habendo variación entre as solucións patrimoniais (con absorción de iode) e as cultas (co seu mantemento). Observamos relatinizacións, certamente apoiadas polo modelo do castelán como forza coadxuvante, para substantivos e topónimos en que antigamente prevalecera a forma patrimonial: desgracia (3.1), Galicia (2.2, 2 veces; 4.1), gracia (3.2), gracias (2.2, 4.1), penitencia (3.1, 3.2). Sobre os cultismos non se efectúa en ningún caso unha intervención purista que busque darlles feitura patrimonial aos seus sufixos ou terminacións: asistencia (3.1), Dalmacio (3.2), decencia (2.1), noticia (2.2, 3.1). Canto á variación entre ?ción e ?zón, ou entre ?sión e ?són, a preferencia polas variantes cultas tampouco admite excepcións. Dáse, desde logo, nos substantivos de entrada tardía ou sen tradición no idioma, como conversions (1.2), consecracion (3.1), peregrinacion (3.1, 4.1) e redempcion (1.1). Pero dáse, tamén, con substantivos que na Idade Media ou nos séculos seguintes se empregaran só ou preferentemente coa terminación ?ón, como condicion (4.1), devocion (3.1, 4.1), intencion (3.2), obligacions (3.2), oracion (2.1), persecucion (2.1), persecucions (2.1) e posesion (1.1). O sufixo procedente do latino ?BILIS é ?ble (respetable, 4.2), habitual nas fontes dos Séculos Escuros e do século XIX xunto con ?bre. Por conseguinte, tampouco neste caso se procurou nin no galego antigo nin no portugués unha solución que puidese poñer distancia entre a solución galega e a solución castelá.
Nº 367 270