Chus Pato asina a “Carta aberta a Europa” do festival Días de Poesía e Viño

A académica de número Chus Pato é a autora da "Carta aberta a Europa" da última edición do festival de Días de Poesía e Viño que se celebrou a finais de agosto en Eslovenia, unha das principais citas poéticas europeas. A misiva, escrita en galego e difundida en distintas linguas, aborda a situación de guerra en Ucraína, a identidade europea e mais a emigración como elemento que contribúe a dita identidade partindo da experiencia persoal dunha viaxe que realizou polas terras ucraínas acompañada pola tamén poeta Erin Moure.

Chus Pato recitando versos da súa autoría no festival Días de Poesía e Viño. Autor: Matej Pusnik

“Oxalá poidamos ver o mencer no que Europa non padeza o capricho dun deus patriarcal nin os celos da súa consorte divina. Oxalá se cumpran mil primaveras máis para estes campos que compartimos e para os idiomas, aínda hoxe desprezados, que algúns e algunhas escribimos e falamos e nos que intensas amamos”, conclúe Chus Pato na carta que leu no encontro.

A poeta tamén participou no festival recitando versos da súa autoría que o público escoitou en galego e esloveno.